.webp){kind=icon}
„Епл“ (Apple Inc), кој веќе се соочува со помала продажба во Кина, предупреди дека приходите во празничниот квартал ќе бидат приближно исти како минатата година, навестувајќи дека инвеститорите нема да видат закрепнување на растот на кој се надеваа.
Додека приходите на ајфон се очекува да се зголемат во декемврискиот квартал, вкупната продажба ќе биде слична на претходниот период, рече финансискиот директор Лука Маестри за време на презентацијата на резултатите во четвртокот по кварталниот извештај на „Епл“. Слабите проекции ги намалија акциите дури за 4,6 отсто во доцното тргување.
Аналитичарите од берзата предвидоа раст на приходите од околу пет проценти во кварталот, што е традиционално најдобриот период за продажба на „Епл“..
Акциите на „Епл“ паднаа на само 169,33 долари во тргувањето по работното време. Во Њујорк тие завршија на 177,57 долари, што значи дека растот годинава се задржа на околу 37 отсто.
Компанијата го претстави новиот ајфон, нејзиниот водечки производ, во текот на кварталот. Сепак, уредот беше лансиран на 22 септември, така што кварталот вклучуваше само нешто повеќе од една недела од неговата продажба. Компанијата со седиште во Купертино, Калифорнија, исто така објави нови модели на часовници – „серија 9“ и „ултра 2“ - и нови слушалки „ерподс про“ (AirPods Pro).
Bloomberg
Остварена е продажба од 43,8 милијарди долари, додека аналитичарите очекуваа 43,7 милијарди долари. „И покрај стравувањата, постигнат е квартален рекорд за продажба на ајфон во Кина“, рече Маестри за време на конференциска врска со аналитичарите. Заработката во минатиот квартал беше 1,46 долар по акција, надминувајќи ја консензуалната процена од 1,39 долар.
Маестри исто така рече дека компанијата инвестира „доста“ во вештачката интелигенција. „Блумберг“ неодамна објави дека „Епл“ планира да ја претстави технологијата на неколку нови апликации и услуги следната година. „Со текот на времето, ќе видите како овие производи се развиваат“, рече Маестри , „и оваа технологија ќе биде нивниот столб“.
Ајфон сочинува приближно половина од приходите на „Епл“ од продажбата, така што инвеститорите внимателно го следат лансирањето на секој нов модел. Со „ајфон 15“, компанијата ги редизајнираше поскапите верзии, давајќи им обвивки од титаниум, и додаде функции како понапредна леќа на камерата. Тие се надеваа дека ова ќе привлече нови купувачи на паметни телефони што деновиве се одлучуваат да ги задржат своите стари модели подолго.
Други околности ѝ одеа во корист на компанијата бидејќи моделот „ајфон 14 про“ од 2022 година се соочи со ограничувања во снабдувањето поради затворањето на партнерските фабрики на „Епл“ во Кина. Производството на моделот „ајфон 15“ не беше проследено со слични проблеми.
Што вели „Блумберг економикс“...
„Помалиот обем на продажба во Кина е обесхрабрувачки и може да биде предизвикан од послабата потрошувачка низ економијата“, рече Анураг Рана, аналитичар во технолошкиот сектор.
Компанијата соопшти дека ајфон постигнал рекордна продажба на неколку развиени и неколку пазари во развој, вклучувајќи и во Индија.
Пазарот на персонални компјутери исто така покажува знаци на заживување, но „Епл“ не претстави никакви нови модели во текот на кварталот.
