text size
„Фолксваген“ (Volkswagen AG) соопшти дека планира да инвестира девет милијарди реали (1,8 милијарда долари) во Бразил од 2026 до 2028 година, настојувајќи да ги електрифицира своите автомобили во земјата со нова хибридна платформа и нови модели.
„Новиот инвестициски проект ќе влијае на сите четири фабрики на компанијата во Бразил: Анчиета, Сао Карлос, Таубате и Сао Хозе дос Пињаис“, рече извршниот директор на „Фолксваген“ во Бразил, Чиро Пособом, за време на презентацијата во четвртокот.
Германскиот производител на автомобили, кој сака да го зголеми својот профит во регионот, ја објави иницијативата една недела откако „Џенерал моторс“ (General Motors Co.) ги најави плановите за инвестирање седум милијарди реали во Бразил до 2028 година. Се очекува и „Стелантис“ (Stellantis NV) да ги објави своите планови за земјата до крајот на февруари. Новите инвестиции од автомобилската индустрија во најголемата економија во Латинска Америка доаѓаат откако владата на претседателот Луис Инасио Лула да Силва во декември објави насоки за забрзување на енергетската транзиција.
„Ние сме бренд што по пандемијата ја најавува најголемата инвестиција овде во земјата“, рече Пособом.
Bloomberg Mercury
Владината програма за зелена мобилност и иновации, наречена „Мовер“, вклучува барања за одржливост на возниот парк и даночни стимулации за компаниите што инвестираат во декарбонизација и производство на нови технологии. Целта на програмата е да се промовира ширењето на инвестициите во енергетската ефикасност, вклучувајќи ги и минималните барања за рециклирање за производство на возила и наплата на помал данок за оние што помалку загадуваат.
Иницијативата ќе понуди повеќе од 19 милијарди реали даночни олеснувања за компаниите да инвестираат во декарбонизација.
Бразилската автомобилска индустрија се придвижува кон спроведување на плановите за декарбонизација и намалување на емисиите во моделите произведени и продадени во Бразил. Иницијативата е и одговор на новата офанзива на кинеските брендови, како „Греј вол мотор“ (Great Wall Motor Co.) и БЈД (BYD Co.), кои веќе објавија планови за производство на електрифицирани модели во Бразил од годинава.
Новата инвестиција на „Фолксваген“ доаѓа како дополнување на седумте милијарди реали планирани за тековниот циклус, од 2022 до 2026 година. Во текот на следните четири години германскиот производител на автомобили планира да претстави 16 нови производи на бразилскиот пазар.
Од тој вкупен број, два нови автомобила ќе се произведуваат во фабриката во Анчиета, во Сао Бернардо до Кампо, најстарата фабрика на компанијата во земјата. Таубате ќе добие ново возило, додека Сао Хозе дос Пињаис ќе прави нов пикап. Фабриката во Сао Карлос ќе прави нов мотор, „потехнолошки и поефикасен“, според Пособом.
„Фолксваген“ ја заврши 2023 година како втор по големина продавач на автомобили и лесни комерцијални возила во Бразил, со удел од 16 отсто, според здружението на трговци на автомобили во земјата. „Фиат“ (Fiat) беше лидер на пазарот со удел од 22 отсто.
За разлика од другите пазари, Бразил користи етанол најмалку 40 години за да ги намали емисиите, а биогоривото се појави како преодна алтернатива кон целосна електрификација во јужноамериканската земја. Наместо огромни инвестиции во фабрики за батерии за 100 проценти електрични автомобили, компаниите се стремат да развијат хибридни модели, при што електричен мотор работи заедно со моторот со внатрешно согорување, кој е флексибилен односно може да работи на бензин или етанол. „Тојота“ (Toyota Motor Corp.) беше пионер во развојот на флексибилно хибридно решение, продавајќи модели со оваа опција од 2020 година во Бразил.
.webp){kind=icon}
