Нема веќе компензации со фирми со блокирани сметки

Компаниите со блокирани сметки веќе не можат да плаќаат со компензации, цесии, асигнации. Забраната за таканареченото плаќање со пресметка стапи во сила од 1 јануари годинава, а е предвидена со Законот за платежни услуги и платни системи.

Плаќањето со пресметка се дефинира како меѓусебно намирување на паричните обврски и побарувања меѓу учесниците во платниот промет со компензација, асигнација, цесија, преземање долг и други облици на меѓусебно намирување на обврски и побарувања.

Оваа забрана се одложуваше со години. Првпат беше воведена во 2007 година во Законот за платен промет. Таму е наведено дека друштвата, како учесници во платниот промет, не можат да вршат плаќање со пресметка доколку имаат блокирана трансакциска сметка.

„Сепак, поради разни околности, примената на предметната забрана за друштвата за плаќања со пресметка беше постојано одложувана и не стапи во сила. За разлика од друштвата, соодветната забрана за буџетските корисници стапи во сила од нејзиното воведување и истата таа е во примена до денешен ден“, вели во изјава за „Блумберг Адрија“ адвокатот Иван Мишев од адвокатското друштво „Папазоски и Мишев“ од Скопје.

Адвокат Иван Мишев/Приватна архива

Според него, одолжувањето на примената на оваа забрана доведе до тоа компаниите што имаат блокирани сметки долго време да живеат без готовина. Сега му се става крај на тоа, а забраната оди во правец на подобрување на ликвидноста.

Сепак, тој предупредува дека забраната за плаќање со пресметка може да биде ризик за компаниите што работат добро, а соработуваат со фирми што имаат блокирани сметки. Таквата соработка од почетокот на годинава е незаконска.

„Доколку на вашето друштво му биде понудено од страна на доставувач, соработник или клиент што е договорна страна намирување на меѓусебните парични обврски и побарувања со пресметка (компензација, асигнација, цесија, преземање долг и сл.), можно e да бидете изложени на одредени правни ризици доколку платежната сметка на договорната страна е блокирана. Првиот ризик е утврдување на ништовност на намирувањето со пресметка во судска постапка од причина дека истото тоа е незаконито. Понатаму, постои и зголемен ризик од поведување постапки за побивање на должникови дејства и обесштетување од страна на доверителите на договорната страна“, вели Мишев.

Законот за платежни услуги и платни системи стапи во сила во 2022 година. Министерството за финансии потоа поднесе измени на законот, кои сè уште се во собраниска процедура, но во нив не е предложено одложување на забраната за плаќање со цесија, компензација, асигнација со компанија што има блокирана сметка.