.webp){kind=icon}
Прилепската компанија ПИ „Витаминка“ АД оствари вкупни приходи во износ од 3.480.186 илјади денари (56,6 милиони евра) во 2023 година, што е за девет отсто помалку во однос на 2022 година. Компанијата успеала да ги намали значително и расходите, а годината ја завршила со нето сеопфатна добивка од 87.647 илјади денари (1,4 милион евра), што е речиси за трипати повеќе од резултатот остварен во 2022 година (2 отсто профитна маржа). Добивката пред оданочување изнесува 74.840 илјади денари (1,2 милион евра).
Нето-добивката по оданочување без преостанатата добивка изнесува 1,114 милион евра и е за 2,2 пати поголема од таа во претходната година.
Во структурата на вкупните приходи најголемо учество, 98 отсто, имаат приходите остварени од продажба на производи и услуги од основна дејност, кои во споредба со остварените во 2022 година за извештајниот период бележат пад од 10 отсто и изнесуваат 3,41 милијарди денари (55,5 милиони евра). „Падот на вкупните приходи е во корелација со оперативното работење за извештајниот период и најголемо влијание има падот на цената на маслото за јадење“, се наведува во образложението на финансиските резултати. Инаку, компанијата има пад на приходите остварени на домашниот пазар за 16 отсто, но мал раст на приходите од продажбите на странските пазари.
Остварените оперативни вкупни расходи за 2023 година изнесуваат 3.429.814 илјади денари (54,6 милиони евра) и во споредба со остварените во 2022 година бележат пад од 16 отсто. Од компанијата известуваат дека падот на вкупните расходи е во корелација со оперативното работење за извештајниот период, а најголемиот пад е во набавните цени на стоките, додека меѓу финансиските расходи најголем е растот на трошоците за камати.
Во 2023 година компанијата не подели дивиденда за добивката што беше остварена во 2022 година.
Од „Витаминка“ информираат дека вкупните инвестиции во основни средства за 2023 година изнесуваат 96.907 илјади денари. Генерално, инвестицијата се однесува на купувањето опрема, недвижен имот, градежна реконструкција и адаптирање.
Вкупните единечни обврски по долгорoчни и краткорочни кредити на 31.12.2023 година изнесуваат 1.488.101 илјада денари и во споредба со состојбата на 31.12.2022 година, од 1.630.448 илјади денари, бележат пад од 9 отсто.
Во периодот јануари-декември 2023 година во ПИ „Витаминка“ АД Прилеп не биле реализирани дополнителни нови вработувања.
