„Реплек“ ќе продава голем колач акции преку јавна понуда

„Реплек“ планира отуѓување на најмногу 2.111 обични сопствени акции во вкупен номинален износ од 1.187.268 евра по пат на јавна понуда. Во предлог-одлуката за која ќе се одлучува на претстојното собрание на акционери се наведува дека станува збор за акции што претставуваат 8,14 проценти од основната главнина на друштвото.

„Продажбата на сопствените акции ќе се врши по пат на јавна понуда во согласност со Законот за хартии од вредност и правилата за тргување на Македонската берза за хартии од вредност АД Скопје. За продажбата (отуѓувањето) на сопствените акции по пат на јавна понуда друштвото ќе објави проспект и покана за јавна понуда за продажба (отуѓување) на сопствени обични акции, во согласност со законската и подзаконската регулатива, статутот на друштвото и правилата на Македонската берза на хартии од вредност и Централниот депозитар за хартии од вредност“, пишува во предлог-одлуката.

Во неа се додава дека номиналната вредност по акција изнесува 562,42 евра и дека продажната цена на акциите што ќе бидат предмет на јавната понуда ќе се определи во согласност со правилата за тргување на Македонската берза АД Скопје.

„Целта поради која се продаваат акциите е одржување на стабилноста и ликвидноста на друштвото и усогласување со законските одредби“, се наведува во предлог-одлуката.

Во моментов нема коментари за веста. Биди прв да коментира...

Остави коментар