„Алкалоид“ оствари добивка од 7,8 милиони евра за три месеци

„Алкалоид“ АД Скопје во првите три месеци од годинава оствари консолидирана нето-добивка од 479,5 милиони денари (7,8 милиони евра), што е зголемување за девет проценти во однос на истиот период минатата година, кога добивката на компанијата изнесуваше 441,5 милион денари (7,1 милиони евра), покажува неревидираниот консолидиран биланс на успех на компанијата објавен преку Македонската берза.

Остварените консолидирани вкупни приходи во периодот јануари-март 2024 година бележат раст од 12 проценти во однос на првото тримесечје од 2023 година. Во структурата на вкупните приходи, најголемо учество, 99 проценти, имаат приходите остварени со продажба на производи и на услуги, кои во споредба со остварените во 2023 година бележат раст од 13 проценти. Остварените консолидирани вкупни расходи во периодот јануари-март 2024 година бележат раст од 13 проценти во однос на истиот период од 2023 година.

Од вкупните консолидирани продажби, 73 проценти се остварени на странските пазари.

„Најголем пораст кај извозните пазари бележат продажбите остварени во земјите од Источна Европа (раст од 25 проценти) и во земјите од Западна Европа (раст од 21 процент)“, информираат од компанијата.

Оттаму додаваат дека во 2024 година, во насока на посветеноста за постојана модернизација и за проширување на производствените капацитети, производствените волумени и на асортиманот, во „Алкалоид“ ја комплетирале реализацијата на својот најголем инвестициски потфат во последните две децении - новиот погон за производство на цврсти фармацевтски форми „Таблетно одделение 2.0“ и придружните технички простории.

„Новиот техничко-технолошки капацитет, чија цел е повеќе од двојно зголемување на обемот и поголема флексибилност во производството на цврсти фармацевтски форми, зафаќа површина од 6.200 м2 (производствени и технички простории), а за него ’Алкалоид’ вложи вкупно 19,4 милиони евра“, соопшти компанијата.

Вкупните инвестиции во основни средства во периодот јануари-март 2024 година изнесуваат 298,2 милиони денари (4,8 милиони евра). Од компанијата информираат дека во периодот јануари-март 2024 година се реализирани 90 нови вработувања.

Бизнис-планот за 2024 година предвидува инвестирање на околу 10 проценти од консолидираните приходи од продажби во материјални и во нематеријални средства, раст од 10 проценти на консолидираните продажби во однос на реализираните во 2023 година, како и раст од 7 проценти на консолидираниот профит пред оданочување во однос на 2023 година.

„Трендот на работење во отежнати економски услови, кои беа актуелни во изминатите неколку години, сосема е извесно дека ќе продолжи и во 2024 година. Доминантни предизвици беа инфлацијата и порастот на каматните стапки, кои сепак, според сите очекувања, би требало да влезат во зоната на стагнација, а можеби и мало опаѓање. Секако, безбедносните глобални кризи ги отежнуваат економскиот амбиент и предвидливоста, што секогаш може да повлијае и на цените на енергентите, да создаде тешкотии кај синџирите на испораки, но и да повлијае на достапноста на одредени материјали“, наведуваат од компанијата. 

Од „Алкалоид“ очекуваат во 2024 година да продолжат по патеката на континуираниот раст базиран на можностите од тековните инвестиции во новите производствени капацитети и опреми и вложувањата во развојноистражувачките проекти, на тој начин создавајќи конкурентно портфолио и можности за ширење на пазарите.

„За остварување на овие цели ќе продолжиме и со нови вработувања во земјава, но и на странските пазари, притоа континуирано вложувајќи во издигнување и усовршување на нивото на знаења и вештини на нашите вработени и градење таленти“, наведуваат од компанијата.

Во моментов нема коментари за веста. Биди прв да коментира...

Остави коментар