„Реплек“ го „освои“ Туркменистан, на ред е ЕУ

„Реплек“ АД Скопје во првите три месеци од годинава оствари добивка по оданочување од 22,8 милиони денари (372.000 евра), што е зголемување за 21 процент во однос на истиот период минатата година, кога добивката на компанијата изнесувала 18,9 милиони денари (308.000 евра), покажува неревидираниот консолидиран биланс на успех на компанијата објавен преку Македонската берза.

Од компанијата информираат дека консолидираната оперативна добивка на групацијата „Реплек“ за првиот квартал од годинава изнесува 31,4 милион денари (511.000 евра) и бележи раст од 29 проценти во однос на истиот период во 2023 година.

Приходите од продажба како дел од вкупните оперативни приходи изнесуваат 387,9 милиони денари (6,3 милиони евра) и бележат раст од 26 проценти во однос на истиот период минатата година. Од „Реплек“ објаснуваат дека во првиот квартал од 2024 година има промена во структурата на приходи во однос на 2023 година, односно дека е целосно прекината трговијата на разни стоки, со што компанијата целосно се посветува на сегментот фармација како стратегиска определба. 

Консолидираните приходи од продажба на сегментот фармација изнесуваат 380,8 милиони денари (6,2 милиони евра) и бележат раст за 26,9 проценти во однос на минатата година. Приходите од продажба на странските пазари изнесуваат 312,2 милиони денари (5,07милиони евра), што е зголемување за 23 проценти во однос на истиот период во 2023 година.

„Врз основа на веќе потврдени нарачки, првите испораки на пазарите во Европската Унија ќе бидат реализирани во вториот квартал од 2024 година“, информираат од „Реплек“.

Од компанијата посочуваат дека во првиот квартал од 2024 година ја прошириле својата географска присутност со реализација на првиот извоз кон новиот пазар во Туркменистан.

„Амбициозните планови за овој пазар се поддржани од очекувањата за приходи од продажба во висина од еден милион евра во текот на 2024 година“, укажуваат од компанијата.

Оттаму додаваат дека приходите од продажба на домашниот пазар изнесуваат 69 милиони денари (1,12 милион евра) и се зголемени за 50 проценти во однос на истиот период во 2023 година.

„Со оглед на овие развојни настани, ’Реплек’ АД и понатаму останува посветен на стратегијата за раст, одржувајќи го планот за распределба на приходите од 75 проценти од извоз и 25 проценти од продажба на домашниот пазар“, наведуваат од компанијата.

Инаку, бизнис-планот на „Реплек“ за 2024 година предвидува консолидирани продажби во износ од 31 милион евра со проектиран нето-профит од минимум 3,5 милиони евра, што претставува 24 проценти раст на продажбата во однос на реализираните резултати во 2023 година. 

„Во рамките на финансискиот план за 2024 година, ’Реплек’ се фокусира на консолидација на постојните пазарни позиции и активно целење на нови стратегиски партнерства на странските пазари. Оваа двојна стратегија предвидува зголемување на приходите на 23 милиони евра на странските пазари и продолжување на растот на приходите на 8 милиони евра на домашниот пазар“, посочуваат од компанијата.

Од компанијата додаваат дека имајќи ја предвид стратегијата за иновации во фармацевтската индустрија, „Реплек“ во 2024 година продолжува со значителни инвестиции во технолошки напредок, оптимизација на производствените капацитети и дигитализација.

„Инвестицискиот план вклучува имплементација на системи за серијализација и современа линија за пакување, дигитализација и вложување во современо решение ЕРП (ERP), како и модернизација на објектите и подобрување на работните услови. Вкупната сума на инвестиции во опрема за периодот јануари-март 2024 година во споредба со остварените во истиот период во 2023 година бележи значителен раст од 541 процент“, велат од компанијата.

Оттаму укажуваат дека со новите инвестиции се очекува зголемен производствен капацитет, што е во насока на поддршка на очекуваниот пораст на компанијата.

Во моментов нема коментари за веста. Биди прв да коментира...

Остави коментар