Подем на „Адико банка“: Што ќе добијат новите акционери?

Вредноста на „Адико банка“, која котира на берзата во Виена, достигна нов рекорд бидејќи регионалните играчи се тркаат за да обезбедат сопственост на австрискиот заемодавец.

Само на денешното тргување цената на акциите на банката во еден момент скокна за пет отсто, на 20 евра. Тоа се случи откако „Нова љубљанска банка“ (НЛБ) ден претходно објави понуда за преземање на акциите на „Адико“, што е последна во низата такви понуди. Да потсетиме, за австриската банка конкурираат двајца српски бизнисмени: Миодраг Костиќ преку „Агри Европа Кипар“ и Давор Мацура, кој ја предводи „Алта пеј груп“. „Агри Европа“ има цел да стекне 17 проценти, а „Алта пеј“ 29,59 проценти од банката.

Bloomberg Chartmaker

„Гледано од поширока перспектива, од втората половина на март годинава, кога започнаа поинтензивните изрази на интерес за купување акции во ’Адико груп’, пазарната вредност на компанијата се зголеми од 295 милиони евра на сегашните 390 милиони евра. Тоа е најголемата вредност досега на компанијата, која котира на Виенската берза од средината на 2019 година“, велат аналитичарите на „Блумберг Адрија“.

Уделот на сопственоста сега вреди 253 проценти повеќе отколку во средината на 2020 година, во екот на кризата поради ковид, додаваат тие.

„Во однос на релативното вреднување на компанијата, односот цена-заработка по акција моментално е 9,4x, во споредба со 7,1x, колку што беше во втората половина на март, пред интензивирањето на понудата за откуп. Уште поважно, односот цена-заработка на ’Адико груп’ сега е повисок од тој на сите други регионални банки котирани на берзите, како што се ’Уникредит’, ’Интеса’, ’Рајфајзен’, ’Ерсте’, ОТП и НЛБ, додека медијаната на целата групација е 6,4x“, посочува аналитичкиот тим.

Bloomberg Terminal

Додека соодносот цена-добивка по акција може да значи дека акциите на „Адико“ се скапи, спротивен заклучок е извлечен од односот цена-книговодствена вредност. „Тој сооднос за ’Адико груп’ е 0,5x, што е меѓу најниските во споредба со гореспоменатите конкурентни банкарски групи и половина од средната вредност на таа група од 1x“, забележуваат аналитичарите.

Bloomberg Terminal

Инаку, НЛБ сака да преземе 100 проценти, односно сите акции на „Адико“ по цена од 20 евра, во која влегува и неодамна изгласаната дивиденда, која сè уште не е исплатена. Акционерите практично добиваат понуда од 18,74 евра од словенечката банка, бидејќи изгласаната дивиденда од 1,26 евро во секој случај би ја добиле, без разлика на исходот од трансакцијата.

Покрај проширувањето на можностите на НЛБ во четирите земји каде што „Адико банка“ е веќе присутна (Словенија, Србија, Босна и Херцеговина и Црна Гора), тоа ќе им овозможи и пристап до хрватскиот пазар, кој, според извршниот директор на НЛБ, Блаж Бродњак, стана многу важен за нив откако земјата го усвои еврото и влезе во шенген-зоната.

Понудата на „Агри Европа“ официјално беше објавена во четвртокот, а таа подразбира цена од 16,24 евра за акција по исплата на дивидендата. Истовремено, од „Алта пеј“ објавија дека се во процес на финализирање на добивањето на сите потребни регулаторни одобренија за стекнување квалификувано учество од речиси 30 отсто од акциите.

Доколку регулаторите го одобрат предлогот на НЛБ, тој ќе се квалификува како конкурент на понудата на „Агри Европа“. „Во тој случај сите акционери на ’Адико’ што ја прифаќаат понудата на ’Агри Европа’ пред објавувањето на меморандумот за понудата на НЛБ можат да се повлечат од својата изјава за прифаќање на предлогот на ’Агри Европа’“, соопшти словенечката банка.

„За првиот квартал од годинава ’Адико груп’ објави зголемување на нето-добивката од 61 отсто на годишно ниво на крилата на растот на нето-приходите од камати од 14,5 отсто и зголемувањето на кредитното портфолио од пет отсто. Инвеститорите во случајов се привлечени и со зголемувањето на нето-каматната маржа за 35 базични поени на 3,89 отсто, а квалитетот на кредитното портфолио се подобрува со намалувањето на учеството на нефункционалните изложености за 0,3 процентни поени, на 2,1 отсто“, потсетуваат аналитичарите на „Блумберг Адрија“.

За споредба, ваквите бројки се релативно блиску до еден од актуелните конкуренти во оваа трка, па нето-каматната маржа на НЛБ се зголеми за 59 базични поени, на 3,73 отсто. „Двете банкарски групации имаат силни показатели за капитализација, при што стапката на вкупен капитал на ’Адико’ е 20,3 отсто, додека на НЛБ е 20,7 отсто“, заклучува аналитичкиот тим.

Во моментов нема коментари за веста. Биди прв да коментира...

Остави коментар