НЛБ ја зголеми понудата, дава по 22 евра за секоја акција на „Адико банка“

„Нова љубљанска банка“ (НЛБ), која на почетокот на јуни и официјално ја објави понудата за преземање на „Адико банка“ (Addiko Bank AG), одлучи да ја зголеми понудата за 10 отсто. Словенечката банкарска групација, која работи и во Македонија, сега нуди 22 евра по акција за австриската банка што има свои банки насекаде во регионот Адрија. Во оваа цена е вклучена и дивидендата за 2024 година, а новата понуда значи дека банката е проценета на 429 милиони евра.

Рокот за прифаќање на понудата од акционерите што ќе одлучат да ги продадат акциите е 16 август. Новата цена е за 15,8 отсто повисока од цената што НЛБ ја нудеше за акциите на „Адико банка“ на 14 мај, кога и беше објавена намерата да ги преземе акциите.

„НЛБ останува убедена дека преземањето на 'Адико банка' ќе ни помогне да го развиеме комерцијалното банкарство, бизнисот со малите и средните претпријатија и дигитализацијата, а исто така ќе ни овозможи индиректно да навлеземе на хрватскиот пазар, кој е најголема економија во нашиот регион и претставува мост меѓу Словенија и другите пазари каде што работиме“, изјави Блаж Бродњак, претседател на Управниот одбор на НЛБ.

На претходно организираната прес-конференција, и Бродњак и членот на Управниот одбор на НЛБ, Арчибалд Кремсер, рекоа дека нивна намера е да стекнат удел од 75 отсто во капиталот на „Адико груп“ и дека тоа е услов за кој не може да се преговара. Овој детаљ се повторува и во новото соопштение.

Се повторува и клаузулата дека услов за понудата е да се добие одобрение од регулаторот на сите пазари каде што работи „Адико банка“. 

Веќе пишувавме дека и двајца српски бизнисмени се натпреваруваат за купување на акциите на оваа австриска банка: Миодраг Костиќ преку „Агри Европа Кипар“ и Давор Мацура, кој ја предводи „Алта пеј груп“. „Агри Европа“ има цел да стекне 17 отсто, а „Алта пеј“ 29,59 отсто од австриската банка. На крајот на минатиот месец „Адико“ објави дека „Алта пеј“ веќе има третина од гласачките права. Набрзо потоа стигна известувањето дека и српскиот „Дипломат пеј“ (Diplomat Pay) станал акционер на австриската банка.

Сепак, на почетокот на јули „Алта пеј“ го повлече своето барање за регулаторно одобрение за стекнување (квалификуван) удел од 10 проценти во капиталот на „Адико банка“, што може да значи дека тие се повлекуваат од трката за австриската банкарска групација.