НЛБ ја објави понудата: Бараат најмалку 75 отсто од „Адико банка“

Нова Љубљанска банка (НЛБ) денеска објави понуда за преземање на австриската банка „Адико банка“. Банката нуди 20 евра по акција, минус евентуалните идни исплати на дивиденди.

Најголемата словенечка банка сака да стекне најмалку 75 отсто од австриската банка, стои во понудата за преземање што денеска ја објави НЛБ. Банката очекува во рок од една година да завршат сите операции поврзани со преземањето.

Во проспекот на понудата стои дека НЛБ сака да откупи најмалку 14.625.000 од вкупно издадените 19.500.000 акции на „Адико банка“. Ова значи дека банката е проценета на 386 милиони евра. 

Менаџментот на НЛБ ќе ја презентира понудата пред заинтересираните на онлајн презентација во понеделник попладне. Денеска понудата беше објавена на официјалната веб-страница на австриската комисија за преземање и на веб-страницата на НЛБ.

Од НЛБ велат дека со објавувањето на меморандумот започнува периодот на прифаќање кој ќе трае од датумот на објавување (7 јуни) до 16 август. 

Меѓу условите на понудата, се наведува дека регулаторните процедури за одобрување на трансакцијата треба да завршат најдоцна до 30.06.2025 година.

Како што пишувавме, во обидот да ја купи „Адико банка“, НЛБ се натпреварува со двајца српски бизнисмени: Миодраг Костиќ преку „Агри Европа Кипар“ и Давор Мацура, кој раководи со „Алта Пеј“.

Акционерите на „Адико банка“ кои ја прифатиле понудата на „Агри Европа“ пред објавувањето на документите за преземање на НЛБ можат да се повлечат од неа и да ја прифатат понудата на НЛБ, наведуваат во понудата. Тие мора да ја прифатат понудата на НЛБ најмалку четири дена пред да истече понудата на „Агри Европа“ на 27 јуни. Од „Агри Европа“ на акционерите на „Адико банка“ им беа понудени 16,24 евра во бруто износ.

Цената на акцијата на НЛБ утрово порасна за два отсто на тргувањето на Љубљанската берза, од 117 на 118 евра, достигнувајќи ја највисоката вредност од почетокот на котација во 2018 година.