.webp){kind=icon}
Ајфоните, паметните телефони на компанијата „Епл“ (Apple Inc.), минатиот месец доживеаја закрепнување на кинескиот пазар. Испораките се зголемија за 52 отсто поради бранот попусти што ги воведоа партнерите за малопродажба.
Најновите податоци на Кинеската академија за информатичка и комуникациска технологија покажуваат дека растат испораките на паметни телефони во земјата, при што приближно 3,5 милиони од нив се странски брендови, според пресметката на „Блумберг“.
Ајфон, всушност, сочинува огромно мнозинство на такви уреди, а неговото брзо враќање доаѓа по растот во март. Пред тоа овој уред доживеа пад во првите два месеца од 2024 година.
„Епл“ и неговите кинески препродавачи ги намалуваат цените од почетокот на годината, а тие зделки се прошируваат и во „сезоната на попусти“, која следува по Кинескиот шопинг-фестивал на 18 јуни.
„Епл“ со седиште во Купертино, Калифорнија, забележа двоцифрен пад во продажбата на својата најнова генерација на телефони, бидејќи изгуби премиум пазарен удел од кинескиот конкурент „Хуавеј“ (Huawei Technologies Co).
Според аналитичарите на „Блумберг интелиџенс“ (Bloomberg Intelligence), на падот на ајфон во Кина може да му дојде крајот, бидејќи во неодамнешното истражување потрошувачите изразуваат поголем интерес за надградба со нови уреди.
„Намалувањето на уделот на ајфонот на кинескиот пазар може наскоро да се стабилизира, бидејќи нашето последно истражување покажува дека 'Епл' се враќа како омилен бренд на паметни телефони меѓу кинеските потрошувачи, откако ваквата позиција беше нарушена од 'Хуавеј'“, напишаа аналитичарите Стивен Ценг и Шон Чен.
„Веруваме дека промената на интересот на корисниците може да се должи на фаворизирањето на премиум производите во Кина, што дополнително е засилено со губењето на довербата во 'Хуавеј' бидејќи потрошувачите чекаат долго време за премиум модели. Повеќе од половина од испитаниците во истражувањето велат тие се подготвени да потрошат повеќе од 4.000 јуани (550 долари) за нивниот следен телефон, наспроти 33 отсто од оние што моментално користат премиум телефони“, заклучуваат овие аналитичари.
