„Керфур“ заврши неславно во Македонија, сега може да се врати на Балканот

Француски „Керфур“ (Carrefour), еден од најголемите светски трговци на мало според приходите би можел да влезе на српскиот пазар, пишува српската редакција на „Блумберг Адрија“. Од компанијата официјално потврдуваат дека се враќаат на Балканот, но не даваат конкретни детали за тоа за кои земји станува збор. 

„Можеме да ве информираме дека нашата групација продолжува да ја спроведува стратегијата за развој дефинирана со стратешкиот план за периодот до 2026 година, која има за цел да отвори продавници во 10 нови земји“, изјавија за „Блумберг Адрија“ од „Керфур. Во реализацијата на оваа развојна стратегија, српскиот пазар и балканскиот регион би можеле да бидат интересни за групацијата до 2026 година“, велат оттаму.

Тие потсетуваат дека „Керфур интернешнл“ (Carrefour International Partnership) што е одговорна за развој на соработката на групацијата со локалните партнери преку договори за франшиза неодамна најави враќање во Грција и Бугарија, каде веќе се отворени неколку десетици продавници.

Најголемиот ланец на супермаркети во Грција, „Склавенитис“, исто така неофицијално беше најавено дека ќе се прошири во Србија на почетокот на годината. Кога „Керфур“, кој влезе на грчкиот пазар во соработка со брендот „Маринопулос“ , престана да работи во Грција поради лошата финансиска состојба, токму „Склавенитис“ го презеде нивниот заеднички бизнис.

„Керфур“ имаше неславен обид во Македонија

А токму грчката компанија „Маринопулос“ беше сопственик на маркетот кој под брендот „Керфур“ се отвори во скопскиот трговски центар „Сити мол“. Хипермаркетот се простираше на површина од 4.650 квадратни метри и во тоа време беше еден од најголемите во земјата. Работеше три години пред да се затвори на почетокот на 2016 година потег кој остави во тое време ненаплатени долгови кон многу македонски компании кои го снабдувале.

„Лидл“ се шири на Балканот

Во моментов на отворање на свои маркети во Македонија и во Босна и Херцеговина работи и најголемиот европски синџир за малопродажба на храна, „Лидл“. Овој бренд, заедно со „Кауфланд“ е дел од групата „Шварц“ (SCHWARZ) и постои повеќе од 40 години. Моментално работи во 31 земја со околу 12.000 продавници и вработува 360.000 луѓе. 

Македонија забележа раст на продажбата на мало од 4,8 отсто на годишно ниво во февруари 2024 година, главно поради поинтензивното дискреционо трошење – сегментот без храна и гориво. Ова беше очекувано, бидејќи како што се смируваше инфлацијата, дел од дискреционото трошење (трошење на стоки кои не се неопходни за живот) доби на интензитет.

„Во Северна Македонија, платите растат најбрзо во регионот и во номинална и во реална смисла, што значително влијае на закрепнувањето на потрошувачката, која беше во блага негативна позиција во 2023 година (-1,2 отсто на годишно ниво). Растот на платите заедно со подобрувањата на пазарот на труд и закрепнувањето на расположението на потрошувачите ќе бидат главните двигатели на растот на потрошувачката што го очекуваме и во наредниот период, вели Марина Петров Савиќ, виша аналитичарка во „Блумберг Адрија“.

 

 

Во моментов нема коментари за веста. Биди прв да коментира...

Остави коментар