Компанијата „СЕБ Глобал платформ Скопје“ ја промовираше првата Регионална берза за поддршка на малите и средните претпријатија во земјава. Апликативниот дел на платформата sebyou.com дава одговор на суштинското прашање за малите и средните претпријатија дали компаниите ја знаат својата пазарна вредност, посочуваат од „СЕБ Глобал платформ“.
„Ова е основната, иновативна услуга што досега беше достапна само за големите корпорации и акционерски друштва, но отсега како таква, за некоја симболична цена, ќе може да ја добијат и МСП. Употребата на дигиталните можности, особено во панедемискиот период, дополнително даде потврда за можностите од примена токму на овој т.н. агрегатен метод за пресметка на нематеријалната вредност на компаниите, преку соодветна економетриско-статистичка компаративна анализа на рацио индикатори дефинирана со меѓународниот сметководствен стандард“, вели основачот на регионална компанија „СЕБ Глобал груп“ (SEB Global Group) и застапник за земјава Александар Ѓорѓиевски.
МИА
Покрај оваа основна услуга, компаниите ќе имаат можност за комуникација Б2Б, консултантски извештаи со соодветен совет за подобрување на работењето, вебинари и достапност до меѓународни стручни публикации, како и можност за здружен настап на ексклузивни саеми, конференции и настани.
Платформата има регионален карактер и цел да овозможи компаниите, односно малите, микро и средните претпријатија, да соработуваат и да го промовираат бизнисот во Македонија и во соседните држави, односно во Југоисточна Европа.
„Со оваа платформа се шири пазарот за компаниите на регионална основа, со што на приватните компании им се овозможува регионот да го направат единствена дестинација за инвестиции и бизнис. Предностите на поголем пазар се познати, се потврдува на примерот на голем број пазари како Европската Унија и од повеќето светски регионални интеграции. Токму со ваквиот пристап деловната заедница ќе може да ги обезбеди сите потребни информации со процена на условите и вредностите на капиталот за донесување инвестициски одлуки“, вели професорот по меѓународна и развојна економија, корпоративен менаџмент, претприемаштво и деловно работење на малите и средните претпријатија Јован Пејковски.
Иднината на регионот е во поврзување и вмрежување на поединечните компании, затоа што само така ќе бидат попривлечни и поконкурентни на големиот пазар на Европската Унија.
.webp){kind=icon}
