Компанијата „Хенес и Мауриц АБ“ - „Ејч енд ем“ (Hennes & Mauritz AB - H&M) забележа послаба добивка од очекуваното во вториот квартал, со образложение дека лошото време во јуни ги принудило клиентите да останат дома.
Оперативниот профит беше 7,1 милијарди шведски круни (670 милиони долари) од март до мај, објави „Ејч енд ем“ во четвртокот. Ова е помалку од очекувањата на аналитичарите за 7,4 милијарди круни. Оперативната маржа беше 11,9 отсто, што е исто така помалку од проекциите.
Продажбата во јуни падна за околу шест отсто (во локални валути) во споредба со минатата година, соопшти „Ејч енд ем“, обвинувајќи го лошото време на многу големи пазари. Продажбата се зголеми паралелно со подобрувањето на временските услови на крајот на месецот, се наведува во соопштението. Претходно во јуни конкурентот „Индитекс“ (Inditex), сопственик на „Зара“ (Zara), соопшти дека забележал зголемување од 12 отсто во продажбата на почетокот на својот квартал во мај.
Новиот извршен директор Даниел Ервер, кој ја презеде функцијата откако Хелена Хелмерсон ненадејно поднесе оставка во јануари, е под притисок брзо да ги зголеми приходите од продажба на „Ејч енд ем“. Трговецот на мало се соочува со сè поинтензивна конкуренција од „Зара“ и новите конкуренти, како што е кинескиот „Шејн“ (Shein).
Досега промената на генералниот директор не резултираше со промена на стратегијата, а не е променета ниту целта за удвојување на продажбата до 2030 година (во споредба со 2021 година). Покрај тоа, компанијата соопшти дека сè уште се држи до целта да забележи оперативна маржа од 10 проценти во 2024 година.
.webp){kind=icon}
