„Уникредит“ ќе побара од ЕЦБ дозвола да купи 30 отсто од „Комерцбанк“

„Уникредит“ (UniCredit SpA) ќе бара регулаторно одобрение за стекнување 30 отсто од акциите во германската банка „Комерцбанк“ (Commerzbank AG), што укажува дека извршниот директор Андреа Орсел размислува за преземање на банката.

Италијанскиот кредитор најверојатно ќе поднесе барање до Европската централна банка (ЕЦБ), која е главен регулатор на банкарскиот сектор во еврозоната, во следните неколку дена, изјави за „Блумберг“ (Bloomberg) лице запознаено со плановите.

Тоа не мора да значи дека „Уникредит“ на крајот ќе купи таков удел или дури дека ќе купи повеќе акции, вели изворот, кој не сакаше да даде официјална изјава бидејќи информацијата не е јавна.

„Уникредит“ претходно купи девет отсто од акциите во „Комерцбанк“, а Орсел подоцна во интервју за ТВ „Блумберг“ изјави дека целосното преземање на германската банка е една од опциите. Тој исто така додаде дека „Уникредит“ би можела да го продаде својот удел во германската банка доколку не се постигне соодветен договор.

Италијанскиот весник „Месаџеро“ (Messaggero) прв пишуваше за планот на „Уникредит“ да поднесе барање до ЕЦБ. Италијанската банка не сакаше да коментира за ова прашање. Ниту ЕЦБ не одговори веднаш на барањето за коментар.

„Уникредит“ минатата недела објави дека ќе побара дозвола од ЕЦБ да купи повеќе од 10 проценти, што во моментов им е дозволено.

„'Уникредит' ќе поднесе регулаторни барања за одобрение за купување повеќе од 9,9 отсто од капиталот на 'Комерцбанк', доколку и кога ќе биде потребно“, посочи заемодавецот во соопштение за печатот кога за првпат соопшти дека има удел во „Комерцбанк“. Тоа би обезбедило флексибилност во пристапот кон инвестицијата на „Уникредит“ во „Комерцбанк“, се наведува во соопштението.

Во моментов нема коментари за веста. Биди прв да коментира...

Остави коментар