Прво обраќање на новиот шеф на „Најк“: „Знам дека не беше лесно“

Елиот Хил, новоименуваниот извршен директор на „Најк“ (Nike Inc.), во својата прва порака до вработените призна дека ситуацијата за најголемиот светски бренд за спортска облека е тешка.

„Знам дека не беше лесно и секако направивме сè што можевме“, напишал Хил во електронска порака до вработените во која „Блумберг“ (Bloomberg) имал увид.

Хил нагласил дека планира да биде домаќин на состанок на 14 октомври, што ќе биде негов прв ден назад во компанијата каде што претходно работеше со децении. Тој, исто така, ја понудил својата нова е-адреса на вработените и побарал од нив да испратат прашања предвреме за тоа што им е на ум.

Во својата порака тој вклучил и видео во кое им нуди совет на вработените „да се движат брзо, со чувство на итност“.

Облечен во црна најк маица, Хил вели дека за време на неговата кариера во компанијата (која трае повеќе од 30 години), „научил секогаш да го става потрошувачот во центарот на сè и секоја одлука“. Сега, рече тој, време е вработените „да се здружат, да се обединат како тим“.

Хил се искачи на корпоративната скала од практикант до претседател за потрошувачки прашања во „Најк“, напуштајќи ја таа позиција во 2020 година. Во ненадејно соопштение во четвртокот, компанијата соопшти дека Хил ќе го замени долгогодишниот извршен директор Џон Донахо.

Компанијата во јуни објави разочарувачки резултати за четвртиот квартал, намалувајќи ги понатамошните финансиски проекции. Слабата заработка предизвика најголем пад на акциите на трговецот на мало откако излезе на берзата. Под кормилото на Донахо, гигантот за спортска облека започна и план за намалување на трошоците од 2 милијарди долари и ја намали својата работна сила за два отсто.

Во моментов нема коментари за веста. Биди прв да коментира...

Остави коментар