„Скопски пазар“ стана втор најголем акционер во „Македонијатурист“

„Скопски пазар“ ги купи акциите што „Изо стоне“ ги поседуваше во „Македонијатурист“ и сега поседува вкупно 44.500 акции, кои претставуваат 9,9 проценти од основната главнина на друштвото, дознава „Блумберг Адрија“. Со овој потег „Скопски пазар“ стана втор најголем поединечен акционер во „Македонијатурист“, компанија во која извесен период има акционерски прегрупирања и обиди за окрупнување на капиталот.

Според нашите извори, кои се добро запознаени со оваа проблематика, но сакаат да останат анонимни, „Скопски пазар“ со овој чекор станува директен конкурент на „МГ фешн“, компанија што е дел од „Фешн груп“ во обидите за окрупнување на сопственичкиот капитал во „Македонијатурист“. „Блумберг Адрија“ веќе пишуваше дека по низа блок трансакции „МГ фешн“ купи 7,69 проценти од вкупниот број акции од „Македонијатурист“. Сепак, „Скопски пазар“ сега ја претекна „МГ фешн“ на листата најголеми акционери во „Македонијатурист“.  

На првото место на оваа листа и понатаму е Доне Таневски, кој поседува 23,4 проценти од вкупниот број акции во „Македонијатурист“, а меѓу другите поголеми акционери се Симеон Павлов, кој поседува 8,19 проценти од вкупниот број акции, „Сава пензиски фонд“ (8,8 проценти) и „Македонијатурист“, која поседува 10 проценти сопствени акции.

Според нашите извори, сега на потег е Таневски, кој ќе треба брзо да реагира и да се одлучи за една од двете страни што ги купуваат акциите во „Македонијатурист“, со оглед на тоа што неговата позиција во сопственичката структура на компанијата е, условно кажано, ослабната откако неговата долгогодишна деловна соработничка Соња Бибановска за 9,1 милиони евра ги продаде своите акции, кои претставуваа 11,27 од вкупниот број акции во „Македонијатурист“. Битно е да се нагласи дека во битката за окрупнување на капиталот, сопствените акциите што ги поседува „Македонијатурист“ не се во игра бидејќи немаат право на глас.

„Скопски пазар“ важи за една од најголемите компании за управување со недвижен имот во Македонија, додека „Македонијатурист“ е позната како најголема хотелиерска компанија во чија сопственост се повеќе хотели во земјава.

 

 

Во моментов нема коментари за веста. Биди прв да коментира...

Остави коментар