„Скопски пазар“ и „Промедика“ ја зголемија сопственоста во „Македонијатурист“

„Скопски пазар“ купи дополнителни 156 акции и сега поседува 89.364 акции односно 19,76 проценти од вкупниот број обични акции издадени од „Македонијатурист“, информираа од компанијата преку Македонската берза. Оттаму додаваат и дека „Промедика“ купила дополнителни 28 акции и сега поседува 53.799 акциja односно 11,90 проценти од вкупниот број обични акции издадени од компанијата.

Од „Македонијатурист“ исто така информираа дека акционерот „МГ Фешн“, која поседува 11,26 проценти од акциите во компанијата за претстојното собрание на акционери закажано за 17 февруари годинава за членови на Надзорниот одбор на „Македонијатурист“ ги предлага Леонид Антиќ, Стефан Спировски, Костадин Саздовски и Сашо Данаиловски, како независен член. Од друга страна, акционерот „Промедика“ за членови на НО на компанијата истовремено ги предлага Димитар Лузевски, Горазд Поповски (независен член), Сашко Бошков и Маја Николовска.

„Блумберг Адрија“ во повеќе наврати пишуваше дека во изминатиов период во „Македонијатурист“ тече процес на ново окрупнување на сопственичкиот капитал што резултираше со низа мултимилионски блок трансакции со акциите на компанијата и целосна промена на поголемите акционери.

Според последните податоци од Централниот депозитар за хартии од вредност, најголем поединечен акционер во компанијата и понатаму е „Скопски пазар“, а потоа следуваат „Промедика“, „МГ Фешн“, Симеон Павлов (10,47 проценти), „Македонијатурист“ (10 проценти) и „Чеза комерц“ ( 6,23 проценти).