„Блумберг“: Европа не треба да му се поклонува на Трамп во делот на технологијата

Сè уште не ја презел функцијата, а моќното влијание на новоизбраниот претседател Доналд Трамп можеби веќе се прошири од Силициумската Долина до Брисел.

Само неколку дена откако Марк Закерберг рече дека ќе ја затвори проверката на факти за американските корисници на „Мета“ (Meta Platforms Inc.), што е очигледен смирувачки потег за Трамп, Европската комисија соопшти дека ги „проценува“ истрагите за пазарната доминација на „Епл“ (Apple Inc.), „Алфабет“ (Alphabet Inc.) и „Мета“.

Потврдувањето каква било информација во Брисел е често тешка работа. „Нема таква процена“, рече портпаролката на комисијата. Но на прес-конференцијата во вторникот друг претставник како одговор на прашањата за Трамп рече дека можеби постои политичка реалност што врши притисок врз технолошкиот сектор.

Секако дека има. Би било безумно европските антимонополски полицајци да го игнорираат тоа што се случува од другата страна на Атлантикот. Меѓу другото, Трамп му се закани на регионот со царини, а Закерберг ја обвини ЕУ дека се „зафркнала“ со американските компании и го повика идниот претседател да ги запре казните и новите стандарди за блокот.

Има причина зошто ова е во вестите. Ако читате меѓу редови, се чини дека во Брисел постои загриженост дека неговите нови антимонополски службеници нема да се држат до линијата и ќе спроведат брзи и груби регулаторни алатки што им се дадени со новиот Закон за дигитални пазари (DMA), кој стапи во сила во јануари. „Фајненшл тајмс“ прв во понеделникот објави за процените, цитирајќи висок функционер, кој рече дека „фактор“ бил изборот на Трамп. Самото тоа протекување на таква информација сугерира загриженост.

Во прашање е исходот од три тековни случаи против „Епл“, „Алфабет“ и „Мета“ и сите подлежат под тој нов закон. Засега уште никој не е казнет, но имаше обиди да се изнудат промени во однесувањето. Тоа не е ништо лошо. Со години казните едноставно беа трошок за водење бизнис за најголемите технолошки компании и акционерите го знаат тоа. Кога американската Федерална трговска комисија наметна казна од пет милијарди долари за Фејсбук во 2019 година, нејзините акции пораснаа.

На пример, како дел од напорите на Европската комисија во борбата со „Мета“, таа ја принуди компанијата да им понуди на корисниците на ЕУ опција да користат Фејсбук без насочено рекламирање. „Мета“ неодамна почна да ја обезбедува таа опција со претплата од 12,99 евра. Сепак, според комисијата, тоа не било доволно добро и требало да има верзија што подобро ќе ги штити личните податоци и ќе биде бесплатна. Во ноември „Мета“ се согласи да ја намали цената на претплатата за 40 проценти.

Иако беше макотрпно целото ова преговарање, сепак имаше напредок. Претходните европски антимонополски случаи траеја многу години бидејќи зависеа од стари, нејасни закони, кои го ставаат товарот на докажување на регулаторот. Новиот закон со своите 22 конкретни правила за злоупотреба на пазарот беше дизајниран да ѝ овозможи на комисијата да ги сработува случаите побрзо. А во време кога најголемите технолошки фирми ги копираат идеите на своите конкуренти, ги апсорбираат нивните тимови или наоѓаат начини да ги затворат клиентите во нивните екосистеми, честопати без многу повратни информации благодарение на нивните армии лобисти и адвокати, повеќе од потребни беа попаметни алатки за справување со таквите ситуации.

ЕУ веќе покажа дека може да донесе вистинска промена во однесувањето, како што се гледа со отстапките на „Мета“ за пристапот без реклами. Со новото раководство што го презеде кормилото во Брисел, отстапувањето би сигнализирало дека политичкиот притисок може да ја попречи неговата улога на поттикнување пазарна конкуренција и заштита на европските граѓани. Тоа е порака што блокот не може да си дозволи да ја испрати.

 

Во моментов нема коментари за веста. Биди прв да коментира...

Остави коментар