Европа ги зголемува трошоците за одбрана, „Рајнметал“ ја зголемува продажбата

„Рајнметал“ (Rheinmetall AG) предвидува дека приходите и оперативната добивка ќе продолжат да растат годинава, додека германскиот производител на оружје го користи растот на европските трошоци за одбрана.

Производителот на оклопното возило „боксер“ (Boxer) предвидува дека приходите ќе се зголемат за 25-30 проценти, додека оперативната маржа ќе биде околу 15,5 проценти. Во главната област на нивното работење, во секторот за одбрана, растот на приходите ќе достигне дури 40 проценти.

„Започна нова ера на вооружување во Европа, која ќе бара многу од сите нас“, рече извршниот директор Армин Папергер во средата.

Акциите на „Рајнметал“ во стрмна нагорна траекторија Bloomberg

„Рајнметал“ се позиционира како еден од најголемите профитери од растот на европската индустрија за вооружување, кој беше поттикнат од војната во Украина и неодамнешните закани од САД дека може да го повлечат својот безбедносен ангажман во Европа. Претстојната германска влада планира да отклучи стотици милијарди евра за воени трошоци и ги повикува лидерите на ЕУ да го направат истото тоа.

Цената на акциите на „Рајнметал“ се зголеми повеќе од двојно во последната година, додека компанијата го ширеше производството и изгради огромно портфолио на нарачки за муниција и воени возила. Вредноста на акциите се зголеми дури за 3,4 проценти во раните часови на тргување во средата.

Предвидувањето за маржата годинава не ја достигна процената од 16,1 проценти од анкетата на „Блумберг“. Сепак, извештајот не ги зема предвид неодамнешните политички промени, а „Рајнметал“ соопшти дека ќе ги приспособи своите цели кога барањата на клучните купувачи како што се Германија и Украина ќе станат појасни.

 

Консолидираните приходи минатата година се зголемија за 36 проценти, на околу 9,75 милијарди евра, што е малку помалку од целните 10 милијарди евра. Оперативната маржа од 15,2 проценти ја надмина просечната процена на аналитичарите од 14,8 проценти. Профитабилноста во секторот за одбрана достигна 19 проценти, на кој сега отпаднаа околу 80 проценти од вкупните приходи на „Рајнметал“.

Компанијата за производство на оружје исто така пријави рекордна резерва на нарачки од 55 милијарди евра, во споредба со 38,3 милијарди евра претходната година. „Рајнметал“ планира да исплати дивиденда од 8,1 евра по акција во споредба со 5,7 евра претходно.

„Рајнметал“ произведува сè, од оклопни камиони и дронови до топ од 120 милиметри за тенкот „леопард 2“ (Leopard 2). Компанијата гради нови фабрики во земји како Литванија, Унгарија, Романија и Украина за да ја задоволи растечката побарувачка за оружје и муниција.

Цената на акциите на компанијата се зголеми за повеќе од 1.000 проценти од почетокот на војната во Украина во февруари 2022 година. Акциите на конкурентските компании БАЕ (BAE Systems Plc), „Талес“ (Thales SA) и „Леонардо“ (Leonardo SpA) исто така се зголемија. „Леонардо“ во вторникот соопшти дека очекува нарачки во вредност од 118 милијарди евра во наредните пет години, додека Европа значително ги зголемува трошоците за одбрана за да го надомести веројатниот недостиг од американски ангажман.

Bloomberg

Папергер минатиот месец имаше состанок со украинскиот претседател Володимир Зеленски, за да разговараат за зголемување на присуството на компанијата во Украина. Според официјалниот сајт на претседателот, Папергер и Зеленски разговарале за заеднички индустриски проекти, особено во врска со производството на муниција од 155 милиметри во Украина.

„Претседателот на САД, Доналд Трамп, има право да врши притисок на Европа да ги зголеми трошоците за одбрана, имајќи ја предвид агресијата на Путин“, рече Папергер за телевизијата „Блумберг“ во јануари, додавајќи дека САД и Европа треба да работат заедно на зајакнување на Украина.

Извршниот директор моментално ужива исто ниво на заштита како и германскиот канцелар, откако американската власт откри план на Русија да го убие.