Владислав Хаџидинев поднесе оставка од функцијата член на Управниот одбор и извршен директор на Универзална Инвестициона (УНИ) Банка АД Скопје, информираа од институцијата преку Македонската берза.
Надзорниот одбор на Банката на седница одржана на 30 април 2025 година ја прифатил оставката, а Хаџидинев ќе остане на функцијата до 30 јуни 2025 година, кога официјално ќе му престане мандатот.
Како причина за повлекувањето ја наведе својата одлука да прифати нови работни предизвици во Бугарија.
„По речиси една деценија исполнета со предизвици и успеси, одлучив професионалната кариера да ја продолжам во Бугарија. Горд сум што УНИ Банка денес е препознатлива како модерна и успешна институција. Годините поминати овде се меѓу највредните во мојата кариера,“ изјави Хаџидинев.
Од Банката истакнаа дека Хаџидинев дал значаен придонес за растот и развојот на институцијата, како и за нејзиниот позитивен имиџ и репутација. „Му благодариме за досегашниот ангажман и му посакуваме успешна кариера и во иднина. Банката во наредниот период ќе објави кој ќе биде наследник на оваа одговорна позиција,“ соопштија од УНИ Банка.
Хаџидинев беше дел од Управниот одбор повеќе од осум години и се смета за еден од клучните фактори во трансформацијата на Банката во лидер во дигитализацијата и одговорното банкарство.
.webp){kind=icon}
