„Норстат АС“ (Norstat AS) од Осло, Норвешка, има намера да стекне индиректна единствена контрола над друштвото за трговија и услуги „Дата солушонс груп“ од Македонија и над „Семпл Солушнс Б.В.“ (Sample Solutions B.V.) од Холандија, информираше Комисијата за заштита на конкуренцијата.
Норвешката компанија е европски лидер во собирањето податоци за истражување на пазарот. Друштвото е основано во Норвешка во 1997 година и го прошири своето географско присуство во Данска, Шведска, Финска, Естонија, Латвија, Литванија, Полска, Германија, Обединетото Кралство и Ирска, Франција, Швајцарија, Холандија, Австрија и Италија. „Норстат АС“ обезбедува висококвалитетни податоци преку различни методи на собирање, овозможувајќи им на клиентите да добијат сигурни податоци за посакуваните теми на истражување и целни групи.
„Дата солушонс груп“ се занимава со обработка на податоци, хостирање и слични дејности. „Семпл Солушнс Б.В.“ е снабдувач на податоци и технологија фокусиран на услуги за глобално земање примероци и собирање податоци за истражување на пазарот. „Семпл Солушнс Б.В.“ им помага на организациите со спроведување анкети, збогатување на податоци и аналитика, овозможувајќи им на истражувачите и маркетерите прецизно и ефикасно да стигнат до својата целна публика.
„Врз основа на прелиминарното испитување Комисијата утврди дека предметната концентрација може да потпадне под одредбите на Законот за заштита на конкуренцијата. Сепак конечната одлука по ова прашање е резервирана. Комисијата ги повикува заинтересираните трети страни да достават забелешки и мислења за оваа концентрација до Комисијата“, соопшти КЗК.
.webp){kind=icon}
