Нови рекорди - акциите на „Енвидија“ скокнаа за пет отсто

Компанијата „Енвидија“ (Nvidia) ги надмина очекувањата во однос на приходите, но добивката беше под притисок поради новите американски ограничувања за извоз на напредни чипови во Кина. И покрај значителниот еднократен трошок, предизвикан од намалената побарувачка за чиповите Х20 (H20) поради новите извозни правила, инвеститорите позитивно реагираа, зголемувајќи ја цената на акциите во тргувањето по затворањето на берзата. Резултатите ја потврдуваат континуираната силна побарувачка за акцелераторите за вештачка интелигенција (ВИ) на „Енвидија“, но ги нагласуваат и геополитичките предизвици со кои се соочува овој технолошки гигант.

Акциите на „Енвидија“ пораснаа за речиси пет отсто во постпазрното тргување на њујоршката берза, откако производителот на чипови објави солидна прогноза за приходите, пишува „Блумберг“ (Bloomberg).

Финансиските показатели под притисок на отписите

 

Во првиот квартал, кој заврши на 27 април 2025 година, „Енвидија“ оствари приход од 44,1 милијарда долари - пораст од 12 отсто во однос на претходниот квартал и импресивни 69 отсто во споредба со истиот период минатата година. Сепак, ГААП (GAAP) добивката по разредена акција изнесуваше 0,76 долари, а нон-ГААП (non-GAAP) 0,81 долар.

Овие резултати вклучуваат значителен отпис од 4,5 милијарди долари поврзан со вишок резерви на чипови Х20 и обврски за набавка, откако американската влада на 9 април ја извести „Енвидија“ дека мора да добие лиценци за извоз на тие производи во Кина, што доведе до намалена побарувачка.

Без тој товар, нон-ГААП добивката по акција би изнесувала 0,96 долари. Бруто-маржата според ГААП изнесуваше 60,5 отсто, додека без отписи, нон-ГААП бруто-маржата достигна 71,3 отсто. Компанијата напомена дека маржите може да бидат нешто пониски од очекуваното додека се забрзува воведувањето на новата архитектура блеквел (Blackwell), но целта е да се вратат во опсегот од „средни 70 отсто“ до крајот на годината.

 

Кинески ограничувања

Новите извозни правила на администрацијата на Трамп значително влијаеја врз работењето со чиповите Х20, дизајнирани специјално за кинескиот пазар за да се усогласат со претходните рестрикции. Пред воведувањето на новите лиценцни барања, продажбата на производите Х20 во првиот квартал изнесуваше 4,6 милијарди долари.

Компанијата не успеа да испорача дополнителни 2,5 милијарди долари приход од Х20 во истиот квартал. „Енвидија“ предвидува дека во вториот квартал од фискалната 2026 година ќе изгуби околу 8 милијарди долари приход поради овие ограничувања.

Bloomberg

Извршниот директор Џенсен Хуанг изјави дека САД треба да ги ублажат ограничувањата за извоз на чипови во Кина. Сепак, компанијата работи на нови верзии на чипови што ќе ги задоволат американските регулативи, а според „Ројтерс“ (Reuters), планира да лансира поевтин чип блеквел за Кина.

ВИ го движи растот на датацентрите

Сегментот на датацентри останува клучен двигател на растот, со приход од 39,1 милијарда долари во првиот квартал - зголемување од 10 отсто во однос на претходниот квартал (кога приходот изнесуваше рекордни 35,6 милијарди долари) и 73 отсто на годишно ниво. Овој резултат е малку под очекувањата на Волстрит од 39,2 милијарди долари. Хуанг нагласи „неверојатно силна глобална побарувачка за ВИ-инфраструктурата на ’Енвидија’“, додавајќи дека „земјите низ светот ја препознаваат ВИ како клучна инфраструктура“.

Финансиската директорка Колет Крес, според ЈФ (Yahoo Finance), истакна дека речиси 50 отсто од приходите на датацентрите доаѓаат од гиганти како „Амазон“ (Amazon), „Гугл“ (Google) и „Мајкрософт“ (Microsoft).

Други сегменти и дивиденда

Сегментот за гејминг исто така забележа рекорден приход од 3,8 милијарди долари - раст од 48 отсто квартално и 42 отсто годишно. Компанијата најави нови графички картички џифорс РТХ (GeForce RTX 5070) и РТХ (RTX 5060), дел од серијата џифорс РТХ 50 (GeForce RTX™ 50) што е базирана на архитектурата Енвидија блеквел (NVIDIA Blackwell), кои носат напредок во рендерирањето поттикнато од вештачка интелигенција. Сегментот за професионална визуализација оствари приход од 509 милиони долари, додека автомобилскиот сегмент забележа 567 милиони долари приход.

„Енвидија“ ќе им ја исплати следната квартална дивиденда од 0,01 долар по акција на 3 јули 2025 година на сите акционери евидентирани до 11 јуни 2025 година.

Прогнози

За вториот квартал „Енвидија“ прогнозира приход од 45 милијарди долари (плус или минус 2 отсто), што ја вклучува и споменатата загуба од 8 милијарди долари поради ограничувањата за Х20. Очекуваните ГААП и нон-ГААП бруто-маржи се 71,8 и 72,0 отсто.

Компанијата и понатаму работи на постигнување бруто-маржа во опсегот од средина на 70 отсто до крајот на годината, и покрај можните привремени намалувања поради забрзаното воведување на чиповите блеквел.

Bloomberg

И покрај предизвиците, акцијата на „Енвидија“ порасна за повеќе од пет отсто во посттргувањето, што укажува на доверба на инвеститорите во долгорочната стратегија и доминантната позиција на компанијата на пазарот на ВИ-чипови. Аналитичарите истакнуваат дека „Енвидија“ и понатаму ја остварува најголемата економска добивка во ВИ-циклусот и дека нејзината вредност останува оправдана со можностите на пазарот, и покрај проблемите со Кина.