Директорот на „Енвидија“ сака да продаде дел од својот удел во вредност од 550 милиони долари

Милијардерот Марк Стивенс, директор на „Енвидија“, продаде повеќе од еден милион акции на производителот на чипови неделава, додека акциите закрепнуваат од бавниот почеток на годината.

Продажбата на акции на Стивенс беше поделена на две трансакции, во понеделникот и вторникот, според поднесеното барање до Комисијата за хартии од вредност во средата. Со продажбата се собраа речиси 150 милиони долари.
Овие трансакции се дел од предложената продажба на акции објавена во поднесокот во понеделникот за дури четири милиони акции на „Енвидија“ - вредни околу 550 милиони долари во тоа време. Трансакциите ги спроведува „Мерил Линч“ (Merrill Lynch).

Поднесениот формулар од понеделникот не го обврзува Стивенс да ги продаде преостанатите три милиони акции. Минатата година тој поднесе сличен формулар, регистрирајќи продажба на три милиони акции во септември, но на крајот продаде помалку од една шестина од нив во серија трансакции во текот на еден месец.

Стивенс (65) има нето-вредност од 9,8 милијарди долари, според индексот на милијардери на „Блумберг“, кој главно се состои од неговите акции во „Енвидија“, инвестициско портфолио и сопственички удел во „Голден стејт вориорс“ (Golden State Warriorsi).

Стивенс не одговори на барањето за коментар, а „Енвидија“ одби да коментира.

Продажбата доаѓа во време кога акциите на компанијата со седиште во Санта Клара, Калифорнија, растат по оптимистичката прогноза за приходите. По речиси непрекинатиот раст поради незаситната побарувачка за нејзините чипови за вештачка интелигенција, акциите на „Енвидија“ годинава паднаа поради загриженоста за трговските политики и потенцијалното намалување на трошоците. Тие на 4 април достигнаа најниско годишно ниво по најавите за царини на претседателот Доналд Трамп за „денот на ослободувањето“.

Оттогаш акциите на „Енвидија“ се искачија за речиси 50 проценти додека компанијата настојуваше да ги смири инвеститорите. Минатата недела компанијата објави дека продажбата во првиот фискален квартал скокнала за 69 отсто, на 44,1 милијарди долари, и изјави дека очекува приходи од околу 45 милијарди долари во тековниот период, кој трае до јули. Во неделата по објавувањето на заработката акциите пораснаа за 5,3 отсто, на 141,92 долари.

Стивенс е најголемиот индивидуален акционер на акциите на „Енвидија“, покрај извршниот директор Јенсен Хуанг, и поседува околу 0,2 отсто од компанијата. Инвеститорот во ризичен капитал е меѓу триото членови на одборот на „Енвидија“ што станаа милијардери како резултат на успехот на производителот на чипови, поттикнат од вештачката интелигенција.

Стивенс првпат инвестираше во „Енвидија“ во 1993 година, додека беше во „Секвоја капитал“ (Sequoia Capital), служејќи во одборот на производителот на чипови до 2006 година. Тој повторно се приклучи во 2008 година и оттогаш е член на управниот одбор.

Инаку, и други претставници на „Енвидија“ ги покажаа своите намери за продажба. Компанијата минатата недела откри дека Хуанг усвоил нов план за продажба на шест милиони акции до крајот на годината. Со вчерашната цена на затворањето на тргувањето, акциите би вределе околу 850 милиони долари.

Хуанг вчера објави дека на 2 јуни им донирал и 660.000 акции на својата фондација и на фонд за кој го советувале други донатори. Акциите вредеа повеќе од 90 милиони долари врз основа на цената на затворањето во понеделникот.

Главниот финансиски директор Колет Крес исто така усвои план за продажба на 500.000 акции - во вредност од повеќе од 70 милиони долари, за периодот од средата до 24 март 2026 година. Брук Сивел, друг член на одборот, во март усвои план за продажба на околу 1,1 милион акции.

Вкупната вредност на продажбата на акции од инсајдери во „Енвидија“ минатата година надмина рекордни две милијарди долари, според податоците од Вашингтонската служба што ги следи купувањата и продажбите од инсајдери. Досега, 2025 година започнува побавно, само со неколку трансакции од инсајдери во вкупен износ од околу 30 милиони долари пред продажбата на Стивенс, покажуваат податоците.