Батериите стануваат стандард - складирањето струја е законска обврска

Новите производители на струја од обновливи извори на енергија ќе имаат обврска за складирање струја, а иста таква обврска има и државната енергетска компанија ЕСМ.

Новиот Закон за енергетика предвидува дека „електроцентралите кои користат варијабилен обновлив извор на енергија имаат обврска во склоп на електроцентралата да инсталираат складиште на електрична енергија со инсталирана моќност еднаква на 20 отсто од инсталираната моќност на електроцентралата изразен во MW. Капацитетот на складиштето мора да обезбеди циклус на полнење и празнење од минимум два часа со максимална инсталирана моќност на складиштето“.

Складирањето струја се гледа како решение за надминување на сегашните проблеми кои се појавуваат во текот на денот кај производителите на струја од соларните електрани. Вишокот струја веќе предизвика проблеми во претходниот период, а надлежните институции донесоа и одлука за исклучување на соларните електрани, по потреба, во период од мај до октомври.

ТАБ МАК

Во правец на зголемување на интересот за инвестирање во батериски системи за складирање, Владата донесе одлука и за намалување на царините за литиум-јонските батерии. Намалувањето на царината за литиум-јонските батерии е дел од пошироката стратегија за зголемување на капацитетите за складирање електрична енергија и поддршка на енергетскиот сектор, соопшти неодамна Министерството за финансии.

Складирањето струја има перспектива во Македонија

Според годишниот извештај на Регулаторната комисија за енергетика, производството на струја од соларни панели лани се зголеми за 186 отсто споредено со 2023 година. Во фотонапонските централни биле произведени  853 GWh електрична енергија.

Ваквиот раст создава потреба за стабилизација на електроенергетската мрежа, а токму батериските системи играат клучна улога во овој правец, вели во разговор за „Блумберг Адрија“, Димче Јанковски, менаџер за продажба на системи за  складирање на електрична енергија во компанијата „TAБ MAK“ од Пробиштип. Компанијата е ќерка на словенечкиот производител на батерии „ТАБ“ и е членка на македонската асоцијација за сончева енергија „Солар Македонија“.

„Перспективите за развој на бизнис поврзан со складирање енергија во Македонија се исклучително позитивни. Индустриските потрошувачи сè повеќе ги препознаваат предностите од инсталација на соларни системи во комбинација со батерии директно на нивните локации, што им овозможува значително намалување на трошоците за електрична енергија. Најавените регулаторни промени и очекуваните поддршки дополнително ги охрабруваат инвестициите во оваа област“, вели Јанковски.

ТАБ МАК

Батериите како спас за мрежата

Батериските системи овозможуваат складирање на вишокот струја. Засега, батериите имаат способност за чување со времетраење од два до четири часа, но технологијата брзо се развива и очекувања се дека, како во случајот со батериите за мобилните телефони, во следниот период чувањето струја ќе се зголемува.

Складирањето струја е едно од најважните решенија за предизвиците со кои се соочуваат електроенергетските мрежи, вели Јанковски.

„Нивната способност да складираат вишок енергија, особено од обновливи извори како што се соларните електрани, и да ја вратат таа енергија во мрежата кога потрошувачката е поголема, овозможува постабилно балансирање на мрежата. Освен тоа, батериите придонесуваат за намалување на оптоварувањето во периоди на врвна потрошувачка, со што се спречува преоптоварување на мрежата во критични моменти. Дополнително, овозможуваат полесна и побезбедна интеграција на обновливите извори, кои по својата природа се непредвидливи и нестабилни“, објаснува тој.

Пониските царини ќе ги намалат цените

„TAБ“ произведува литиум-јонски батерии и батериски системи во Словенија, а досега има инвестирано и 20 милиони евра во производство и опрема таму.  Намалувањето на царините во земјава ќе донесе повеќе придобивки за компанијата. Една од нив е флексибилноста на цените што ќе го поттикне интересот за овие производи.

„Ќе се намали вкупниот трошок за увоз, што директно би влијаело на зголемување на конкурентноста на нашиот производ на пазарот, би ја поедноставило логистиката и би го олеснило планирањето на залихите. Пониските трошоци би ни овозможиле поголема флексибилност при формирањето на цените, што дополнително ја засилува конкурентноста на локалниот пазар, и го зголемува интересот кај дистрибутерите и крајните корисници“, вели Јанковски