„Епл“ (Apple Inc.) пријави најголем квартален раст на приходите во последните три години, надминувајќи ги очекувањата на Волстрит, благодарение на зголемената побарувачка за ајфони, стабилизацијата на пазарот во Кина и значајниот пораст на приходите од услуги.
Во третиот фискален квартал, кој заврши на 28 јуни, приходите на „Епл“ пораснале за 9,6 отсто и достигнале 94 милијарди долари. Тоа е далеку над проценетите 89,3 милијарди долари, според податоците собрани од „Блумберг“. Компанијата предвидува дека растот ќе продолжи и во четвртиот квартал, со прогноза од 5 до 9 отсто раст на приходите – повторно над пазарните очекувања.
„Забележавме забрзување на растот на повеќето пазари во светот, вклучувајќи ги Кина и многу пазари во развој“, изјави генералниот директор Тим Кук во разговор со аналитичарите.
Тим Кук
Bloomberg
Продажбата на ајфони достигна 44,6 милијарди долари, што е значително повеќе од очекуваните 40,1 милијарди. Клучен двигател на овој успех е новиот „ајфон 16е“ (iPhone 16e), поевтин модел од 599 долари, кој привлече голем број купувачи во февруари. Дополнително, американските царини ги натераа потрошувачите да купуваат уреди пред потенцијално зголемување на цените, што го засили растот.
Во Кина, еден од најважните пазари за „Епл“, приходите достигнаа 15,4 милијарди долари, што е раст од 4,4 отсто во однос на истиот период минатата година и над очекуваните 15,2 милијарди долари.
Секторот за услуги – кој ги вклучува App Store, iCloud, Apple Music и други дигитални понуди – оствари приходи од 27,4 милијарди долари, раст од 13 отсто. Овој сегмент е најбрзорастечкиот дел од бизнисот на „Епл“, но се соочува со сè поголем регулаторен притисок. Меѓу потенцијалните ризици е и можната забрана на договорот со „Гугл“ за поставување на неговиот пребарувач како стандарден на уредите на „Епл“ – договор што носи околу 20 милијарди долари годишно.
Тим Кук изјави дека „Епл“ значително ги зголемува инвестициите во вештачка интелигенција, особено во развојот на големи јазични модели (LLM), но остана таинствен околу деталите од стратегијата. Се разгледува и можноста за соработка со надворешни компании во оваа област.
Компанијата досега годинава има купено седум мали фирми, а Кук најави дека е отворен и за поголеми аквизиции ако тие се во линија со долгорочната стратегија.
Линијата „Мек“ (Mac) покажа силен перформанс, со продажба од 8,05 милијарди долари (очекувани беа 7,3 милијарди), благодарение на новите модели „мекбук ер“ (MacBook Air) и „мек студио“ (Mac Studio). Од друга страна, продажбата на ајпади падна за 8,1 отсто и изнесуваше 6,58 милијарди долари, под очекуваните 7,1 милијарда.
Bloomberg
Сегментот на носливи уреди и додатоци – кој ги опфаќа „епл воч“ (Apple Watch), „ерподс“ (AirPods), „хоумпод“ (HomePod) и „вижн про“ (Vision Pro) – бележи пад од 8,6 отсто, со приходи од 7,4 милијарди долари. Овој дел некогаш се сметаше за клучен за диверзификација на приходите, но неговиот раст забави по 2021 година.
Особено разочара финансискиот настап на „вижн про“ – уредот од 3.499 долари, чиј развој траеше речиси една деценија. Продажбата е слаба, а „Епл“ планира само мало техничко освежување во текот на годинава, со поголеми промени најавени дури за 2027 година.
Bloomberg
„Епл“ работи на нови продукти што треба да го зајакнат портфолиото: паметни очила што би ѝ конкурирале на „Мета“, нов „епл воч ултра“ со сателитска поврзаност, нови „ерподс“, ТВ-уред „епл“ и уред за паметен дом со екран и нов оперативен систем.
На прашањето дали уреди со вештачка интелигенција без екран можат да го заменат ајфон, Кук одговори:
„Тешко е да се замисли светот без ајфон. Верувам дека новите уреди ќе бидат комплементарни, а не замена за него“.
.webp){kind=icon}
Во моментов нема коментари за веста. Биди прв да коментира...