Акциите на Редит (Reddit Inc.) скокнаа откако компанијата објави најпрофитабилен квартал досега и проектираше приходи за третиот квартал што далеку ги надминуваат очекувањата на аналитичарите, што укажува на зајакнување на нејзиниот бизнис со дигитално рекламирање.
Компанијата во четвртокот соопшти дека очекува приходите за тековниот квартал да бидат меѓу 535 и 545 милиони долари, при што средината на тој опсег е значително над просечната процена на Волстрит од 473 милиони долари. Нето-добивката изнесува 89 милиони долари, над двојно повеќе од просечната аналитичарска процена од 36 милиони долари.
Откако стана јавна компанија во март 2024 година, Редит интензивно инвестира во рекламна технологија за да ја зголеми својата позиција во пазарот на дигиталното рекламирање, каде што доминираат гиганти како „Мета“ и „Гугл“. Приходите од реклами главно доаѓаат од мал број големи огласувачи, но Редит се фокусира на привлекување мали и средни компании за да го намали ризикот. Покрај тоа, компанијата гради односи со меѓународни огласувачи за да ја диверзифицира својата клиентела, изјави извршната директорка Џенифер Вонг во интервју.
„На нашата платформа гледаме сè повеќе активни огласувачи“, рече Вонг. „Инвестициите во продажниот тим, рекламната технологија и нашата стратегија – едноставно, сето тоа дава резултати“.
Во вториот квартал Редит оствари приходи од 500 милиони долари, далеку над очекуваните 425 милиони. Акциите на компанијата скокнаа до 20 отсто во тргувањето по затворањето на берзата во четвртокот. Пред објавата, акциите беа во пад од 1,4 отсто од почетокот на годината.
„Редит конечно сфати како да ги монетизира корисниците, а не само да ги собира“, напиша аналитичарот Џереми Голдман од „Емаркетер“ (Emarketer). „Одличен квартал — сега останува да видиме дали огласувачите ќе почнат да го третираат Редит како неопходен канал, а не само интересна опција“.
Корисничките содржини на Редит станаа вреден извор на податоци за поголемите технолошки компании што развиваат модели на вештачка интелигенција за четботови. Иако огласувањето и натаму носи најголем дел од приходите, Редит има склучено договори за лиценцирање податоци со „Опен еј-ај“ (OpenAI) и „Гугл“ (Google) и активно бара нови партнери.
Компанијата исто така се стреми да ја искористи својата архива од 20 години податоци. Во декември лансираше сопствен четбот базиран на вештачка интелигенција – РА (Reddit Answers), со цел подобро прикажување резултати од форумите. Вонг изјави дека фокусот моментално е на развој на внатрешни производи шро ќе се потпрат на тоа „море од знаење“. Компанијата сè уште е во фаза на учење како да заработува од содржината преку надворешни партнери.
Во исто време Редит води правна битка со „Антропик“ (Anthropic PBC), која наводно нелегално ги користи податоците на Редит за своите модели со вештачка интелигенција.
Редит дневно има 110 милиони активни корисници, што е зголемување од два отсто во однос на претходниот квартал, додека РА има 6 милиони активни корисници неделно. На прашањето дали во иднина РА ќе прикажува реклами, Вонг изјави дека „секогаш постои можност за монетизација“, но во моментов фокусот е на развојот и интеграцијата на алатката.
.webp){kind=icon}
