Лековите за слабеење ги „ослабеа“ билансот на состојбата на „Ново Нордиск“ и данскиот БДП

Големиот подем и пад на „Ново Нордиск“ покажува дека при инвестирање секогаш треба да се водиме од мотото - не ставајте ги сите јајца во една кошничка. Данците не го следеа ова правило и сега тоа им се удира од глава. Компанијата што вложи сė на лекови против дијабетес и слабеење, на крајот страдаше од поевтина конкуренција, а последиците од нејзиниот пад се чувствуваат и на национално ниво.

Имено, од највредна европска компанија со пазарна вредност од речиси 600 милијарди евра, „Ново Нордиск“ сега потона на 210 милијарди, а со себе го повлече и целиот дански БДП. Во своите најнови прогнози, тамошната влада ја намали проекцијата за економски раст од три на 1,4 отсто, а „Ново Нордиск“ има најголема „заслуга“ за тоа.

На данската економија најнегативно влијаеше значителниот пад на извозот во САД. Токму на тој пазар „Ново“ ја губи битката со конкуренцијата, првенствено од компанијата „Ели Лили“ (Eli Lilly), која произведува поефикасни и поевтини лекови против дијабетес и слабеење од прочуените „оземпик“ и „вегови“ на „Ново“, со кои практично држеше монопол.

Нашите аналитичари ја илустрираат важноста на „Ново“ за економијата на Данска преку конкретни бројки.

„Компанијата е исклучително важна за данската економија. Во нормални услови ’Ново Нордиск‘ е одговорна за околу 10 проценти од БДП на Данска и, кога ќе се вклучат индиректните ефекти, за околу 40 проценти од извозот на земјата. Во 2023 година ’Ново‘ беше одговорна за речиси 20 проценти од сите нови работни места во земјата“, истакнува аналитичкиот тим на „Блумберг Адрија“.

 

Покрај растечката конкуренција, бизнисот на „Ново“ е негативно погоден од царинските авантури на Доналд Трамп, кои дополнително го еродираат уделот во пазарниот колач на САД, најважната извозна дестинација на оваа компанија.

Иако во текот на летото накратко завладеа оптимизам кај инвеститорите во врска со закрепнувањето на „Ново“, на почетокот на месецов акциите повторно потонаа на рекордно ниско ниво. За само една недела компанијата изгуби 33 проценти од својата вредност, или околу 70 проценти во споредба со највисоката цена достигната минатото лето.

 

 

Во очаен обид да ги сврти работите, пред еден месец „Ново“ го назначи ветеранот од компанијата „Мазијара“ (Maziara), Мајк Дустдар, за свој извршен директор, но оваа кадровска промена очигледно нема да донесе моментално решение за сите проблеми на компанијата.

Нашата анализа истакнува дека општиот песимизам на инвеститорите се пренесува на потрошувачите и се претвора во негативна спирала. Тоа го покажува и индексот на доверба на потрошувачите во Данска, кој неодамна значително опадна.

„Данските потрошувачи се сè понесигурни, делумно поради пошироката глобална неизвесност, но и поради стравувањата дека наглото забавување во фармацевтскиот сектор би можело да има директно влијание врз националната економија, што досега се покажа како вистина“, велат аналитичарите на „Блумберг Адрија“.

Претесен пазар

И покрај сите предизвици, не е сè толку црно. Според кварталните резултати објавени во август, бизнисот на „Ново“ останува солиден. Заработката остана силна, а компанијата постигнаа раст и на продажбата од 67 проценти на годишно ниво од 19,53 милијарди дански круни (2,6 милијарди евра).

Само „оземпик“ и „вегови“ остварија 6,7 милијарди евра приходи или околу две третини од вкупниот износ објавен во кварталот, а во соопштението што ги придружуваше најновите деловни бројки беа објавени и планови за удвојување на директната продажба до потрошувачите.

Без разлика колку пазарот ги удираше акциите на „Ново“, не можеме а да не почувствуваме дека таа е сè уште стабилна и солидна компанија со многу поздрави фундаменти од, да речеме, „Тесла“. Само времето ќе покаже дали новиот шеф Дустдар ќе може да ги врати инвеститорите и да ја врати старата слава на компанијата.