Сакате „ролекс“ годинава? Ќе ве чини скапо

Времето истекува за поволните цени на „Ролекс“ (Rolex) – обидете се со „Картие“ (Cartier) или „Јегер-Лелултр“ (Jaeger-LeCoultre).

Шокантната царина од 39 отсто што ја воведе американскиот претседател Доналд Трамп на увозот на швајцарски часовници во САД ги зголемува цените на луксузните модели. Додека некои купувачи се обидуваат да ги избегнат давачките со избор на половни часовници, вредноста на вториот пазар повторно расте. Но сè уште може да се најдат поволни понуди, ако купувачите се подготвени да се откажат од најпознатите имиња и модели и да изберат нешто помалку вредно.

Пазарот на часовници минува низ вистинска ролеркостер-фаза во последните пет години. Интересот експлодира за време на пандемијата, побарувачката ја надмина понудата, листите на чекање се зголемија, а многу купувачи се насочиja кон половните парчиња, што ги подигна цените на популарните модели. Сето тоа се промени во пролетта 2022 година, кога пазарите се затресоа, криптовалутите колабираа, а каматните стапки нагло пораснаа, што го проби меурот на вториот пазар.

Тоа надолно движење сега заврши, барем за водечките приватни часовничарски брендови.

Според најновиот извештај на „Морган Стенли“ (Morgan Stanley) и истражувачката платформа „Воч чартс“ (WatchCharts), цените на половните часовници пораснале за 1,5 отсто во трите месеци до 30 септември, во споредба со претходниот квартал – што претставува прво јасно зголемување на вредноста од првиот квартал на 2022 година.

Индексот Bloomberg Subdial, кој ги следи цените на 50-те најтргувани модели, е зголемен за околу 3,7 отсто во последните шест месеци, мерено во долари.

За да се разбере што го поттикнува растот на вториот пазар, треба да се погледне пазарот на нови часовници. Казнената царина за швајцарските часовници ги принудува брендови­те да ги зголемат цените во Америка.

„Патек Филип“ (Patek Philippe) во средината на септември ги поскапе моделите во САД за 15 отсто, додека „Картие“ ги зголеми цените на повеќето модели за 10 отсто. По две зголемувања оваа година, „Ролекс“ сè уште нема најавено ново поскапување. Но, трговците и колекционерите внимателно го следат неговиот следен потег.

Досега ударот беше ублажен со создавање резерви. Но тие дополнителни резерви ќе се исцрпат до крајот на годината, проценува Оливер Милер, основач на консултантската компанија „Луксконсалт“ (LuxeConsult).

Некои од богатите купувачи се натпреваруваа да го обезбедат посакуваниот часовник пред поскапувањата да стапат во сила. Други, пак, се пренасочуваа кон поевтини варијанти, на пример од златен „ролекс“ кон комбинација од злато и челик или само челик. Во тоа помага фактот што „Ролекс“ нуди слични модели во различни метали. Листите на чекање сè уште растат.

Според „Вонтобел велт менаџмент“ (Vontobel Wealth Management), годинава се очекува „Ролекс“ да произведе околу 1,2 милион часовници, во споредба со 72.000 на „Патек Филип“ и 51.000 на „Одмар Пиге“ (Audemars Piguet). Но кај „Ролекс“ листите на чекање се концентрирани на најпосакуваните спортски модели, како што се „дејтона“, „субмаринер“ и „ГМТ-мастер“. Други купувачи, пак, се пренасочуваат кон половни часовници за да ги избегнат царините.

Како резултат, „Сабдајал“ бележи пораст на активноста на секундарниот пазар оваа година. Со зголемен број купувачи, а ограничена понуда на половни часовници во САД – која во голема мера се сведува на оние што веќе се во земјата – цените се стабилизираат.

Порастот на берзанските пазари и криптовалутите, барем до неодамна, како и скокот на цената на златото, исто така можеби придонесуваат за закрепнувањето. И како што повторно се враќаат „меме-акциите“, можно е и часовничарскиот сектор да доживува мала шпекулативна фаза: падот на вредноста што траеше две и пол години го разбуди интересот на колекционерите, особено за моделите на „Ролекс“, „Одмар Пиге“ и „Патек Филип“. Овие три водечки бренда, кои сочинуваат околу 60 отсто од секундарниот пазар, беа во центарот и на претходниот бум и на последователниот пад. „Патек Филип“ и „Ролекс“ се и во првите редови на тековното, сè уште кревко закрепнување.

Неколку други имиња, како „Картие“, „Омега“ (Omega) на „Своч“ (Swatch AG) и „ТАГ Хојер“ (TAG Heuer) на ЛВМХ (LVMH Moet Hennessy Louis Vuitton SE), исто така забележаа зголемување на вредноста на секундарниот пазар во третиот квартал, покажуваат податоците на „Морган Стенли“ (Morgan Stanley) и „Воч чартс“. „Своч“ го имаше најголемиот раст благодарение на својот модел „мун своч“ (MoonSwatch), но тоа се часовници со пониска цена.

И покрај тоа, многу часовници што се достапни на вториот пазар сè уште изгледаат привлечно. „Ролекс“ е единствениот бренд чии модели се продаваат значително над малопродажната цена на новите, со просечна премија од 15,7 отсто. И дури и тука, околу половина од моделите што сè уште се во производство се продаваат над малопродажната цена. (Кога часовниците се повлекуваат од производство, поради обновување на понудата или по истек на лимитирани серии, нивната вредност најчесто расте.)

Кај „Патек Филип“ и „Одмар Пиге“, повеќето часовници што се продаваат над малопродажната цена се од најпопуларните линии „Нотилус“ и „Акванаут“ кај првиот и „Ројал Оук“ кај вториот. Ниту еден друг бренд нема повеќе од неколку модели што постигнуваат премија на секундарниот пазар.

Кај „Картие“, часовниците што сè уште се во производство во просек се за 31 отсто поевтини од новите верзии – примамлива можност за купувачите привлечени од брендот, кој добива сè поголема популарност. Просечните цени за моделите на „Омега“ и ИВЦ (IWC) на вториот пазар се околу 40 отсто под малопродажното ниво. Не е чудно што обемот на трансакции за овие три бренда нагло порасна.

Уште едно легендарно име што добива на значење е „Јегер-Лелултр“ од групацијата „Ришемон“ (Richemont). Сепак, цените кај овој бренд паднаа за 5,2 отсто во третиот квартал, а повеќето половни модели од линијата „Реверсо“, која списанието „Џи-Кју“ (GQ) ја опиша како „часовникот на 2025 година“, се продаваат значително под малопродажното ниво.

Не е јасно дали позитивниот тренд на секундарниот пазар ќе се задржи, но освен ако не дојде до олеснување на швајцарската царина, цените на новите часовници најверојатно ќе продолжат да растат. Секој што размислува да го потроши бонусот на скап часовник би било паметно да го направи тоа навреме.