Нов вртоглав рекорд на богатството на Илон Маск

Богатството на Илон Маск достигна нов рекорд, првпат надминувајќи 600 милијарди долари, благодарение на новата процена на вредноста на неговата компанија „Спејс екс“ (SpaceX).

Најбогатиот човек во светот има вредност од речиси 638 милијарди долари, според Индексот на милијардери на „Блумберг“ (Bloomberg Billionaires Index), откако „Спејс екс“ достигна процена од околу 800 милијарди долари во продажбата на акции од внатрешни инвеститори - договор што ја прави компанијата за вселенски ракети највредна приватна компанија во светот. Маск е нејзин основач и извршен директор.

Делот од 42 отсто на Маск во „Спејс екс“ е вреден 317 милијарди долари, по применувањето попуст за ликвидност за приватни компании.

Ова е првпат поединец да располага со богатство над 600 милијарди долари според индексот на „Блумберг“. Маск, кој има 54 години, првпат достигна граница од 100 милијарди во 2020 година, кога вредноста на „Тесла“ (Tesla Inc.) - каде што исто така е извршен директор - скокна. Кога беше додаден на индексот во мај 2013 година, тој имаше вредност од само 4,8 милијарди долари.

Богатството на Маск ќе продолжи да расте ако „Спејс екс“ успее да реализира иницијална јавна понуда (ИПО) веќе следната година, каде што целта е процена од 1,5 билион долари. Тоа би ја вреднувало неговата актива на повеќе од 625 милијарди долари, приближувајќи го до позицијата на стане првиот билионер во светот.

„Спејс екс“ е најголемиот играч во индустријата за вселенски лансирања со своите ракети „Фалкон 9“ (Falcon 9) и обезбедува интернет-услуги преку својот сателитски систем „Старлинк“. Таа беше проценета на околу 400 милијарди долари во претходната секундарна понуда во јули.

Покрај тоа, Маск неодамна најави планови за сателитски базирани центри за вештачка интелигенција во вселената.