„Спејс екс“ на Илон Маск се спојува со „Екс еј-ај“, компанијата ќе вреди 1,25 билион долари

Илон Маск ги спојува „Спејс екс“ (SpaceX) и „Екс еј-ај“ (xAI) во договор што ја вреднува проширената компанија на 1,25 билион долари, додека најбогатиот човек во светот се обидува да ги финансира своите сè поскапи амбиции во областа на вештачката интелигенција и вселенските истражувања.

Преземањето на „Екс еј-ај“ беше објавено во соопштение на веб-страницата на „Спејс екс“, потпишано од Маск, со што се потврди претходниот извештај на „Блумберг њуз“ објавен во понеделникот.

Договорот ѝ дава на „Спејс екс“ проценета вредност од 1 билион долари, а на „Екс ај-ај“ 250 милијарди долари, изјавија лица запознаени со случајот.

Вредноста на комбинираната компанија им била соопштена на вработените во меморандум во понеделникот, рекоа некои од тие лица.

„Спејс екс“ соопшти дека ја презела „Екс еј-ај“ за да „создаде најамбициозен, вертикално интегриран иновациски мотор на Земјата (и надвор од неа), кој ќе ги обедини ВИ, ракетите, вселенскиот интернет, директната комуникација со мобилни уреди и водечката платформа во светот за информации во реално време и слобода на говорот“.

Компанијата и понатаму очекува да одржи иницијална јавна понуда (ИПО) во текот на годинава, изјави едно од лицата.

„Спејс екс“ планираше ИПО што би можело да донесе до 50 милијарди долари, што би било најголемата иницијална продажба на акции досега.

Според добро упатени анонимни извори, се очекува акциите на комбинираната компанија да вредат по 526,59 долари. Договорот се реализира целосно преку размена на акции, изјави едно од лицата.

Претставници на „Спејс екс“ и на „Екс ај-ај“ не одговорија веднаш на барањата за коментар.

Договорот обединува две од најголемите приватни компании во светот. „Екс еј-ај“ собра средства во јануари при проценета вредност од 230 милијарди долари, додека „Спејс екс“ требаше да продолжи со продажба на акции во декември, при вреднување од околу 800 милијарди долари.

Условите на понудата, вклучувајќи ги и цената и проценетата вредност, не беа објавени во соопштението на веб-страницата на „Спејс-екс“.

Објаснувајќи ја логиката зад договорот, Маск наведе дека најевтиниот начин за извршување ВИ-пресметки во следните две-три години ќе биде во вселената.

„Само оваа ефикасност во трошоците ќе им овозможи на иновативните компании да напредуваат во обучувањето на своите ВИ-модели и обработката на податоци со невидени брзини и размери, забрзувајќи пробиви во нашето разбирање на физиката и создавањето технологии во корист на човештвото“, напиша тој.

Според документ објавен во петокот, „Спејс екс“ бара дозвола да лансира до еден милион сателити во Земјината орбита за реализација на овој план. 

Оваа понуда дополнително ги испреплетува различните деловни потфати на Маск. Милијардерот ја презеде платформата за социјални медиуми „Твитер“ кон крајот на 2022 година, ја преименува во Х, а потоа ја спои со неговиот стартап за вештачка интелигенција „Екс ај-ај“ во договор вреден 33 милијарди долари.

„Екс ај-ај“, која го управува и четботот Грок, е скапа операција, што троши околу 1 милијарда долари месечно во насока да постигне „подлабоко разбирање на нашиот универзум“.

Спојувањето со „Спејс екс“ обединува капитал, талент и пристап до компјутерска моќ — и ги брише корпоративните граници.

За разлика од некои други потфати на Маск, „Спејс екс“ се издвојува како веројатно неговиот најуспешен и најстабилен бизнис. Компанијата, единствената американска што редовно може да превезува астронаути до и од Меѓународната вселенска станица, е клучен снабдувач на ракетни лансирања и за НАСА и за американското Министерство за одбрана, кое Белата куќа најави дека ќе го преименува во министерство за војна.

Сè позначајни се и растечките приходи што ги остварува преку мрежата „Старлинк“ од повеќе од 9.000 сателити, кои сега ги надминуваат приходите од лансирања и претставуваат потенцијален извор на финансирање за капитално интензивниот бизнис на „Екс ај-ај“.

По објавата за преземањето, „Спејс екс“ соопшти и дека една од неговите ракети „Фалкон 9“ имала неоткриен проблем по лансирањето на серија сателити „Старлинк“ во орбитата.

Компанијата наведе дека, иако горниот дел од ракетата безбедно ги распоредил сите сателити, се случил инцидент непосредно пред леталото да треба да ја напушти орбитата.

 

 

Инцидентот претставува релативно редок проблем за „Фалкон 9“, која последен пат имаше дефект за време на лет во 2024 година.

„Тимовите ги анализираат податоците за да ги утврдат причината и потребните корективни мерки пред ракетата повторно да се врати во употреба“, соопшти „Спејс екс“ во изјава на Х.