„Химс енд Херс“ ја повлече копијата на „Вегови“ по регулаторна истрага

Само два дена по лансирањето на копија од новата таблета за слабеење „Вегови“, „Химс енд Херс“ (Hims & Hers Health Inc.) соопшти дека ќе престане со продажба на лекот.

Објавата доаѓа еден ден откако Американската агенција за храна и лекови - ФДА (Food and Drug Administration – FDA) соопшти дека ќе преземе мерки против копиите на терапии за слабеење, меѓу кои и оние што ги продава „Химс енд Херс“.

Откако имала „конструктивни разговори со засегнатите страни“, „Химс енд Херс“ одлучила да престане да го нуди третманот, соопшти компанијата во објава на платформата X во саботата.

Компанијата во четвртокот објави планови за продажба на поевтина верзија од новата таблета за слабеење „Вегови“ на „Ново Нордиск“ (Novo Nordisk A/S). Производителот на лекот, кој ја темели својата стратегија за пресврт токму на новата таблета, го оцени потегот како нелегален и се закани со правни чекори.

Аналитичарите ја оценија новата таблета „Вегови“ како едно од најуспешните лансирања на лекови во последниве години, победа што ѝ беше неопходна на компанијата.

Следниот ден, ФДА објави дека започнала истрага. Министерството за здравство и социјални услуги на САД, исто така, соопшти дека го упатило случајот против „Химс енд Херс“ до Министерството за правда поради можни прекршувања на федералниот закон.

Претставник на „Ново Нордиск“ не одговори веднаш на барањето за коментар, а и ФДА одби да коментира.

Производителите на блокбастер-лековите од класата ГЛП-1, „Ново Нордиск“ и „Ели Лили“ (Eli Lilly & Co.), подолго време се жалеа дека ФДА не прави доволно за да го запре ширењето на евтините, комбинирани лекови за слабеење. Ова е првпат „Химс енд Херс“ да ја прекине продажбата на копија по поплака од фармацевтска компанија.

Компаниите што нудат здравствени услуги преку интернет првично добија можност да продаваат копии од лекови за слабеење за време на недостигот на овие терапии пред неколку години. Недостигот во меѓувреме заврши, но практиката продолжи.

„Химс енд Херс“ и „Ново Нордиск“ со години имаат тензични односи околу ова прашање. Минатата година двете компании требаше да соработуваат во продажба на поевтини инјекции за слабеење, но партнерството беше раскинато неколку месеци подоцна, делумно токму поради прашањето со комбинираните лекови.

„Имавме договор масовното комбинирање да престане, но за жал тоа не се случи“, изјави тогаш Лудовик Хелфгот, извршен потпретседател за производна и портфолио-стратегија во „Ново Нордиск“.

Извршниот директор на „Химс енд Херс“, Ендрју Дудум, изјави дека нема да „попушти“ пред барањата на фармацевтската компанија во врска со копиите на лекови за слабеење.

„Нема шанси“, рече тој.