Инвеститорите на „Енвидија“ со воздржана реакција на оптимистичката прогноза

„Енвидија“ (Nvidia Corp.), доминантниот производител на процесори за вештачка интелигенција, не успеа да ги воодушеви инвеститорите со најновата прогноза за продажба, што укажува дека загриженоста околу прегреаната ВИ-економија ќе продолжи да ја следи компанијата.

Иако производителот на чипови објави прогноза за првиот квартал што значително го надмина просекот на процените на Волстрит, акциите на „Енвидија“ паднаа за најмногу 1,5 отсто за време на конференцискиот повик со аналитичарите. До средата вечер тие беа речиси непроменети.

Тоа јасно укажа на скепсата што во моментов ја следи „Енвидија“. Откако експлозивниот раст на продажбата го претвори производителот на чипови во највредната компанија во светот, инвеститорите бараат поцврсти уверувања дека бумот на продажбата поврзана со ВИ ќе биде одржлив.

Извршниот директор Џенсен Хуанг им се спротивстави на ваквите стравувања за време на конференцискиот повик, наведувајќи дека клиентите веќе остваруваат приходи од новостекнатата компјутерска моќ. Токму затоа, рече тој, тие ќе продолжат да инвестираат на високи нивоа.

„Потребен ви е компјутерски капацитет, а тоа директно се претвора во раст, кој пак директно се претвора во приходи“, рече Хуанг. „Убеден сум дека нивните парични текови растат.“

Финансиската директорка Колет Крес се обиде да ги ублажи и другите загрижености што ги изнесоа аналитичарите, вклучувајќи ги и стравувањата од ограничувања во снабдувањето. Компанијата обезбедила доволно компоненти за да може да одговори на растечката побарувачка, изјави таа.

Сепак, и понатаму останува предизвик да се произведе доволен број од најнапредните чипови на „Енвидија“, им рече Крес на аналитичарите. Но актуелната линија „блеквел“, како и нејзиниот претстоен наследник наречен „рубин“, сепак ќе ги надминат претходните проекции за продажба, додаде таа. „Енвидија“ претходно соопшти дека овие чипови ќе генерираат 500 милијарди долари до крајот на 2026 година.

„Сметаме дека имаме доволни резерви и договори за снабдување за да одговориме на идната побарувачка, вклучувајќи ги и испораките што се протегаат во текот на календарската 2027 година“, рече Крес.

Компанијата и понатаму се соочува со неизвесност во Кина, најголемиот пазар за чипови. Американската влада издаде дозволи за испорака на мал број процесори Х200 до клиентите таму, но „Енвидија“ не знае дали кинеската влада ќе даде одобрение, изјави Крес. Засега, компанијата ќе продолжи да ги исклучува приходите од центрите за податоци во Кина од своите прогнози.

Дозволата со ограничен обем, одобрена од администрацијата на Трамп, предвидува чиповите да поминат американска инспекција пред да бидат испорачани до клиентите, соопшти „Енвидија“. Дополнително, процесорите подлежат на царина од 25 отсто при влез во САД.

„Енвидија“ е доминантен продавач на акцелераторски чипови, процесори дизајнирани да обработуваат огромни количества податоци потребни за создавање модели на вештачка интелигенција. Овие полупроводници се користат и за извршување на софтверот, фаза позната како инференција кога системите одговараат на реални влезни податоци.

Компанијата со седиште во Санта Клара, Калифорнија, се прошири и во производство на процесори за општа намена, мрежна опрема и комплетни компјутерски системи, што ѝ овозможи уште поголема контрола врз нејзините клиенти.

Невиден раст на „Енвидија“

Инвеститорите се загрижени дека темпото на раст не може да продолжи со ист интензитет

Bloomberg

Приходите во фискалниот прв квартал ќе изнесуваат околу 78 милијарди долари, соопшти „Енвидија“. Иако просечната прогноза изнесуваше 72,8 милијарди долари, некои од аналитичарите очекуваа бројки близу 80 милијарди долари, покажуваат податоците собрани од „Блумберг“.

Во фискалниот четврти квартал, кој заврши на 25 јануари, приходите пораснаа за 73 отсто и достигнаа 68,1 милијарда долари. Добивката изнесуваше 1,62 долар по акција, без одредени ставки. Аналитичарите прогнозираа приходи од 65,9 милијарди долари и добивка од 1,53 долар по акција.

Приспособената бруто-маржа, односно процентот од приходите што останува по одбивањето на трошоците за производство, изнесуваше 75,2 отсто, што исто така благо ги надмина очекувањата.

Сегментот за центри за податоци на „Енвидија“, кој е задолжен за водечките акцелератори за ВИ и мрежни производи, оствари приходи од 62,3 милијарди долари во кварталот. Тоа се споредува со просечната процена на аналитичарите од 60,4 милијарди долари.

Другите сегменти покажаа послаби резултати. Гејминг-секторот, кој нуди графички чипови што некогаш го носеа најголемиот дел од приходите на „Енвидија“, оствари продажба од 3,73 милијарди долари, наспроти просечната процена од 4,01 милијарда долари. Приходите поврзани со автомобилската индустрија изнесуваа 604 милиони долари, додека Волстрит очекуваше 643 милиони долари.

Една сенка и понатаму виси над технолошката индустрија: недостигот од мемориски чипови. Како и поголемиот дел од електронската индустрија, производите на „Енвидија“ зависат од стабилно снабдување со овие компоненти, кои обезбедуваат краткорочно складирање податоци – од паметни телефони до суперкомпјутери. Ограничувањата во снабдувањето ги турнаа цените на меморијата нагоре и ја отежнаа испораката на поголем број уреди годинава.

Тој притисок го забави гејминг-сегментот, а Крес изјави дека не знае дали проблемот ќе се ублажи доволно во текот на годинава за бизнисот повторно да почне да расте.

Во секој случај, чиповите за центри за податоци наменети за ВИ станаа многу поголем фокус. Претходно овој месец, „Енвидија“ соопшти дека „Мета“ (Meta Platforms Inc.) се согласила да распореди „милиони“ процесори на „Енвидија“ во следните неколку години, со што дополнително се зацврстува веќе блискиот однос меѓу двете најголеми компании во областа на ВИ.

Главниот ривал на „Енвидија“, АМД (Advanced Micro Devices Inc.), оваа недела објави сличен долгорочен договор со „Мета“. Производителот на чипови соопшти дека трансакцијата ќе вреди повеќе десетици милијарди долари.

Низа вакви мегадоговори, насочени кон обезбедување долгорочни обврски за компјутерски капацитет, производителите на чипови ги наведуваат како доказ дека ВИ-економијата е силна.

Но ваквата испреплетеност, при што доставувачите и клиентите понекогаш земаат финансиски удели едни во други, предизвика критики дека станува збор за кружни договори што потенцијално ја надувуваат побарувачката.