Стапката на раст на БДП за четвртото тримесечје од минатата година е 0,6 проценти, што е најмал раст во однос на претходните три квартали. Според податоците на Државниот завод за статистика, македонската економија лани ја завршила со раст од 2,1 отсто. Најголем пад е регистриран кај градежништвото и кај преработувачката индустрија, додека најголем раст има кај трговијата на големо и мало.
Бруто-инвестициите во четвртото тримесечје минатата година се со пад од 5,3 отсто, за разлика од претходните три квартали, кога имаа позитивен раст. Според тоа, бруто-инвестициите во 2022 година се зголемија за 15 проценти.
Во производствениот сектор пад е забележан во шест, а раст само во четири сектори.
Најновите економски статистички податоци во емисијата „Премиум“ на ТВ Блумберг Адрија ги анализираме со универзитетската професорка Никица Мојсоска-Блажевски. Според неа, оваа ќе биде тешка година.
Мојсоска вели дека не може да се очекува многу во делот на извозот, а растот ќе го предводи секторот трговија. Таа смета дека приватната потрошувачка ќе го води растот, а очекува негативни тенденции во трговската размена со странство.