.webp){kind=icon}
ИТ-индустријата во Македонија бележи раст. Минатата година бројот на компании од оваа гранка достигнал 2.846, а истите тие направиле приходи од 1,27 милијарди евра.
„Неверојатно е тоа дека овие компании гo прават овој приход, што ако го споредиме со 2021 година е пораст од 36 отсто, додека претходно имавме годишен раст од по 10 отсто“, вели Анета Антова Пешева, претседателка на Собранието на МАСИТ.
Бројот на вработени во оваа индустрија постојано се зголемува, па, така, од 15.514 во 2019 година, во 2022-та изнесува 19.947.
„Речиси по две илјади луѓе се вработуваат секоја година во ИТ-индустријата“, посочува Пешева и додава дека просечната бруто-плата во оваа индустрија во Македонија изнесува 2.260 евра, додека во 2019 година изнесувала 1.490 евра. Токму платата ги задржува работниците во индустријата.
Нето-извозот лани изнесувал 467 милиони евра, додека, пак, во 2019-та бил на ниво од 210 милиони евра.
„Овој нето-извоз значи дека повеќето компании работат за странски фирми“, додава Пешева.
Сепак, таа посочува дека Владата треба да ѝ посвети поголемо внимание на индустријата, бидејќи вели дека нема никаква поддршка со специфични закони за оваа гранка. Потребно е намалување на даноците по примерот на Романија и Бугарија во однос на оваа индустрија. Даночниот систем треба да се промени, персоналниот данок за ИТ-инженерите да се намали.
„Имаме околу три-четири илјади фриленсери што не се регистрирани во системот и тие работат во странство, но поради даночната политика не се пријавуваат во Агенцијата за вработување“, објаснува Пешева. Таа смета дека и земјите што се дел од иницијативата Отворен Балкан треба да го изедначат даночниот систем, со цел да се задржат младите во регионот.
Целиот разговор со Пешева погледнете го во видеото во рамките на објавата.
