.webp){kind=icon}
Брзата пруга за коридорот 10 ќе бара голем број тунели, а тоа би значело доста скап потфат или доста скапо решение ако се одлучи трасата на брзата пруга да ја следи постојната траса.
„Инженерски капацитети имаме за да се изгради, но секако треба добро да се испланира“, вели деканот на Градежниот факултет, Горан Марковски, како коментар во однос на тоа дали Македонија може да се приклучи на брзата пруга што ја планираат Србија, Хрватска и Словенија, при што, според најавите, за пет години возовите од Ниш до Љубљана ќе се движат со брзина од 200 километри на час.
Марковски во своето излагање посочи и дека сè помал е интересот кај младите за изучување на градителството.
Според него, новите инфраструктурни инвестиции треба да бидат мотив за интересот за студирање на Градежниот факултет, бидејќи бројките се алармантни.
„Последната година на факултетот има запишано само девет геодетски инженери и тројца на студиската програма по геодетика. Каква иднина нè очекува со ваков мал број млади луѓе во изучување на градителството можеме само да претпоставиме“, вели Марковски.
Хари Локвенец, пак директор на ЈП „ЖРСМ – инфраструктура“, вели дека засега не треба да се размислува за приклучување кон брзата пруга, туку по влезот на Македонија во ЕУ, кога би се обезбедиле повеќе пари од фондовите, но смета дека фокусот треба да биде на завршување на веќе започнатите проекти.
„До 2027 година треба да биде завршена третата делница од пругата кон Бугарија, која иако е најмала е и најскапа, а процените се дека ќе чини околу 500 милиони евра и за оваа делница ЕУ учествува со половина грант средства од вредноста на целиот проект, а за другата половина интерес за финансирање имаат пријавено Европската инвестициска банка и Европската банка за обнова и развој“, вели Локвенец.
