Македонија сè уште нема дигитална фискална сметка, што е загуба за државата и можност за сива економија. Нејасно е зошто не се преземаат мерки, кога тоа е редовна практика во ЕУ и нема проблем да се инсталира и кај нас, од што бенефиција ќе имаат и купувачите и државата, вели Игор Гешовски, сопственик на „Екологистик сервис“ (ЕЛС), во интервју за „Блумберг Адрија“.
„На Балканот сè уште има енормно плаќање со готовина, а на Запад не е така и оваа состојба треба да се смени“, додава Гешовски.
Тој смета дека пандемијата на ковид остави белег во е-трговијата и го зголеми обемот на тргување на интернет. Гешовски посочува дека компанијата ЕЛС држи повеќе од 40 проценти од пазарот од 36 пошти во Македонија, а планот е и натаму да се развиваат. „Екологистик сервис“ се фузираше со уште три други компании што имаа лиценца да оперираат низ целата држава и со уште три други помали компании од овој сектор. Според сопственикот, резултатите се видливи, а тоа е формулата и за целиот регион.
„Ние не можеме да се пофалиме со добра достава во регионот. Практично, овој регион е најслабиот регион за е-комерц во Европа. Поточно, најлошата или најслабата група се Македонија, Албанија, Косово, Црна Гора и Босна и Херцеговина. Втората група се Србија, Бугарија, Романија итн. Тоа нè тера да размислуваме како да се приклучиме кон светските текови или европските текови за да бидеме на ниво“, вели Гешовски.
Тој додава дека регионот и Македонија сепак се соочуваат со други последици, односно во регионот има голема бирократија бидејќи, како што вели, политичарите воопшто не се фокусирани на развој и не се сервис на бизнисот.
.webp){kind=icon}
