.webp){kind=icon}
Инфлацијата им направи проблем и на осигурителните компании, кои се соочуваат со раст на цените на материјалите и работната рака, како и на исплатата на штети, па прават пресметки и за раст на цените на осигурувањето.
„Одредени полиси мора да поскапат, бидејќи се работи за проценка на ризикот, како квалитативно, така и квантитативно одредување на самите ризици. Имавме значителни поскапувања лани на градежни материјали што се рефлектира со поскапување на вредноста на недвижностите, поскапување во услугите на автомобилскиот сектор, одредени здравствени услуги... Така што сето тоа води кон неопходност на корекција на цените. Цената на осигурувањето е само калкулација на преземениот ризик“, изјави во емисијата „Зум ин“, генералниот директор на „Халк Осигурување“, Ило Ристовски.
Ристовски објаснува и како економската криза се одрази на осигурителниот сектор.
„Секоја економска криза се одразува на севкупното економско работење во државата, така и на осигурителниот сектор што директно, што индиректно, а како последица имаше и промена и на навиките кај граѓаните односно промена на потребата на граѓаните за осигурителни продукти. Тука посебно би го истакнал здравственото осигурување коешто беше едно од најбараните во 2022 година, а она што посебно ни го отежна работењето е севкупниот раст на цените на материјалите и услугите што резултира и во делот на штети. Кога веќе зборуваме за трендовите во осигурителниот сектор, покрај растот на премијата во првиот квартал, јас би напоменал дека важно е да се спомене и растот на штетите кои се зголемени околу 18 отсто во однос на првиот квартал 2022. А штетите се она што е репрезент на нашиот бизнис, односно исплаќањето на надомест на штети“, посочи Ристовски.
Составен дел на нашето работење се приносите од финансиските вложувања, пазарот покажува некои добри трендови во овој период за разлика од претходно, додаде тој.
Сепак, посочува дека во Македонија овој пазар сè уште е слабо развиен и неопходна е едукација на граѓаните и компаниите за придобивките од инвестиции во осигурување.
„Скептицизмот за инвестиции може да биде и оправдан и неоправдан. Може да биде воден и од некое лошо искуство, но она што е наша главна дејност покрај осигурувањето е и едукација на населението за придобивките од осигурувањето, бидејќи нашата работа има и социјален карактер. Значи, во моментите кога на осигурениците им е најтешко, се случил настан од којшто имаат некакви последици ние треба да направиме адекватно и навремено исплаќање на штетите. Јас сум сигурен дека состојбите во тој дел се подобруваат, тука ја имаме и Агенцијата за супервизија на осигурувањето, која е регулатор на осигурителниот бизнис и е во фунцкија на заштита на правата на осигурениците и заеднички работиме на подигање и на свеста и на репутацијата на осигурителните компании“, посочува Ристовски.
