Буџетот е супер-ликвиден и засега нема потреба од ребаланс, вели во емисијата „Зум Ин“, заменик-министерот за финансии Филип Николоски, одговарајќи на прашањето од каде се најдоа пари за покачените плати на функционерите.
„Во првата половина годинава имаме над 12 проценти пораст во приходите во буџетот за разлика од лани и редовно се исплаќаат сите обврски по сите основи, како и по основ за плати на сите вработените во јавниот сектор и функционерите. Има пари односно средства во буџетот за исплата на сите овие плати. Дополнително, доколку овие средства се потрошат има начин односно инструмент да се направи пренамена во буџетот или евентуално ребаланс. Она што е многу важно во моментов, како што кажав на почетокот на прашањето е дека сега за сега нема потреба од ребаланс и тоа е добро, бидејќи ако гледаме години наназад секогаш пред летото, дури и во време на криза во пролетните периоди се зборувало и се правел тој ребаланс, сега за сега сме добри на приходната страна, ја контролираме и расходната страна така што ќе го следиме ова и во наредните месеци“.
Од каде се скрати за овие непредвидени трошоци по основ на повисоки плати на функционерите?
„Па сега за сега, нема скратување, бидејќи како што кажав има пари во буџетот, предвидени се пари во буџетот за плати за сите вработени во јавниот сектор“.
Сепак, не беа предвидени толкави покачувања.
„Да, бидејќи тоа беше одлука на Уставниот суд, која што не би сакал во овој момент да ја коментирам и стапи на сила во април месец оваа година, тоа покачување за овие 1.000 избрани и именувани лица, или функционери како што народски обично се кажува, е на некоја висина на месечно ниво од нешто над 1 милион евра и бидејќи станува збор за нецела година, односно за 8 или 9 месеци во оваа календарска година, буџетот сепак ги опфаќа овие средства во рамки на планираните. Се додека има средства за плати дотогаш нема потреба од никаква пренамена или ребаланс, доколку се истрошат, тогаш веројатно во некоја доцна есен после септември или октомври, има инструменти, дали тоа ќе оди со пренамена или со целосен ребаланс на буџетот, доколку има потреба ќе се оди во таа насока“, вели Николоски.
На прашањето што е со барањата за покачувањата на платите во јавниот сектор, Николоски вели:
„Ние поставивме систем за раст на минималната плата, како и за пензии, и минималната плата е на рекордно ниво со последното покачување и тие пари беа предвидени во буџетот и кај сите оние службеници, односно вработени во јавниост сектор се случи тоа покачување. Кај некој тоа значеше 10 проценти покачување за таа разлика од минималната плата, кај некои 5 проценти кај некои помалку, но тоа се имплементира и беше предвидено. Лани, во време на криза имавме покачување на платите на над 85.000 вработени во јавниот сектор, така што Владата секогаш гледа да излезе во пресрет на вработените, нормално во рамки на можностите, и сето тоа да биде на еден јасен и јавен начин и пристап“, вели Николоски.
Со него зборувавме и за доцнењето со воведување на данокот на екстра профит и даночната реформа, како и најавената аукција на граѓанска обврзница.
.webp){kind=icon}
