.webp){kind=icon}
Во време на агресивна монетарна политика, кога компаниите се борат со ликвидноста, неопходно е формирање развојна банка, која ќе им биде конкуренција на комерцијалните банки, вели во интервју за Блумберг Адрија Горан Ѓорѓиевски, потпретседател на Сојузот на стопански комори.
Тој потенцира дека скапите кредити се сериозен товар за компаниите од сите сектори и дека на долг рок тоа ќе влијае на инвестициите и економската активност.
„Ние од Сојузoт на стопански комори секогаш сме биле поборници да се оформи силна македонска развојна банка, односно македонска развојна банка што би имала сериозно голем капитал да претставува вистинска и реална конкуренција на комерцијалните банки што се во нашата држава, бидејќи овде се соочуваме со еден нонсенс, сите кредити што ги дава Македонската банка за поддршка на бизнисот ги дава преку комерцијалните банки. И вие имате една ситуација повторно да има доста високи камати, а кога тоа повторно ќе дојде кај бизнисот, тој се наоѓа во ситуација да е сериозно оптоварен. Значи, кај нас една солуција, за која многупати сме зборувале, е дека треба да се формира сериозна македонска развојна банка, која би имала независен капитал и би претставувала реална конкуренција на комерцијалните банки. Само така ќе се овозможи директна поддршка на бизнисот со каматни стапки што ќе бидат пониски од оние на комерцијалните банки и ќе се овозможат зголемена продуктивност и конкурентност на компаниите, а ќе се зголемат и инвестициите во современи технолошки средства“, вели Ѓорѓиевски.
Со Ѓоргиевски зборувавме и за влијанието од укинувањето на мерките како ограничување на трговските маржи, нешто што, според него, ќе биде удар за производителите. Во однос на движењето на цените на храната, тој очекува стагнација во наредниот период.
„Во Македонија во целиот период на кризата бизнисот немаше никаква поддршка од државата, единствено субвенција на цената на струјата, која траеше само три месеци, додека, пак, сите околни регионални земји за цело време на ковид-19 и енергетската криза имаа субвенционирана струја, која директно влијае на цената на самиот производ. Бизнисот лани беше сериозно оптоварен, многу компании згаснаа, а последното укинување на законот за ограничување на маржите ќе биде нов удар за производителите, затоа што сега трговските синџири повторно ќе си ги формираат своите маржи повисоко и тоа повторно ќе земе од колачот на производителите. Требаше да профункционира и закон за нефер трговски практики, но не се направи ништо. Во поглед на очекувањата за цените, пак, со оглед на намалувањето на цените на суровините, на берзите ќе има соодветна стагнација на финалната цена, но во овој момент се случува и зголемување на цената на електричната енергија кон бизнисите кај нас, што ќе изврши притисок врз цените. Сè на сè, очекувам еден баланс, една стагнација на цените на ова ниво на кое се сега“, вели тој.
