.webp){kind=icon}
Парното греење во Скопје ќе поскапи за 54 отсто ако се прифатат барањата што до Регулаторната комисија (РКЕ) за енергетика ги доставија компаниите што се занимаваат со оваа дејност. Новите цени што треба да ги одредат регулаторите ќе важат од први август.
Претседателот на РКЕ, Марко Бислимоски, во интервју за „Блумберг Адрија“ вели дека е факт дека има зголемени трошоци во однос на материјалите и опремата, што се должи пред сè на глобалниот раст на цените, но дека анализите се во тек.
„Ги анализираме барањата на компаниите за зголемување на цената на парното греење, но секако нема да дозволиме ценовен шок“, вели Бислимоски.
Стабилизирање има и кај цените на гасот. „Таму во моментов цената е 26-27 евра за мегават-час. Фјучерсите за четвртиот квартал од оваа година се околу 40 евра за мегават-час, за првиот квартал од 2024 година се околу 50 евра мегават-час“, вели Бислимоски.
Прочитајте повеќе: Рекордна потрошувачка на струја вчера: Горештините ги запалија климите
Во однос на цената на струјата, Бислимоски вели дека на светските и регионалните, но и на Македонската берза за струја има одредено стабилизирање на цените на овој енергент.
Bloomberg Adria
„Цените се некаде околу 120 евра за мегават-час. Фјучерсите за четвртиот квартал во однос на електричната енергија се околу 160 евра за мегават-час. Не очекувам дека ќе има драстично зголемување на цената на електричната енергија, како што имавме минатата година, кога во еден период достигна до 500 и 600 евра за мегават-час“, вели Бислимоски.
Во рамките на Стопанската комора на Северна Македонија, каде што функционира Македонската енергетска асоцијација, формирана е работна група што ги даде предлозите за нова подзаконска регулатива што ќе се однесува на поставување батерии за складирање струја од обновливи извори на енергија.
„Верувам дека во септември или октомври ќе имаме нова подзаконска регулатива што ќе се однесува на поставување батерии. Целта е да се подобри пазарното портфолио на веќе поставените фотоволтаични електроцентрали во државата“, вели Бислимоски и додава дека идејата е и во периодите кога многу помалку произведуваат фотоволтаиците да имаат енергија што ќе ја нудат на пазарот. Тој посочува дека батериите мора да се имплементираат во Македонија, бидејќи од 1 јануари 2022 до денес се изградени нови 280 мегавати обновливи извори на енергија, кои во најголем дел односно 240 мегавати се фотоволтаици.
Поради високите температури што ја зафатија и Македонија, овој јули има повисока потрошувачка на струја во однос на минатиот за осум-девет отсто, но затоа, пак, во јуни, поради дождливото време, потрошувачка била помала.
