.webp){kind=icon}
Данокот на капитална добивка, кој стартуваше од годинава, и тоа не само во сегментот на хартии од вредност туку и во сегментот на удели во инвестициски фондови, ги покажа негативните ефекти од почетокот на годинава, вели во интервју за „Блумберг Адриjа“ Лазе Камчев, главен извршен директор на „Генерали инвестментс“.
„Блумберг Адриjа“ веќе анализираше дека во првата половина од годината прометот и бројот на трансакции на Македонската берза бележат пад од над 40 отсто, а намалени се и вредноста на берзанскиот индекс МБИ 10 и пазарната капитализација на компаниите.
Bloomberg Adria
„Имаме подвоеност на инвестициски класи бидејќи депозитите и вложувањето во обврзници не се предмет на оданочување, додека тргувањето со хартии од вредност и вложувањето удели во инвестициски фондови за трансакции во период пократок од две години се предмет на оданочување, што значи дека немаме ист третман“, вели Камчев.
Лазе Камчев (гостување)
Bloomberg Adria
На намалениот промет на Македонската берза дополнително влијаат и глобалните случувања.
„Годинава, сама по себе, е доста специфична. Променет е сентиментот кај инвеститорите, бидејќи имавме одредена доза неизвесност, инфлација, раст на каматните стапки, а сето тоа дополнето со оданочувањето влијаеше на намалување на прометот, на интересот, односно негативно на целокупниот пазар на капитал“, вели Камчев.
Bloomberg Adria
Според него, за следното полугодие, доколку не се промени нешто во овој сегмент, односот на инвеститорите ќе остане ист. Единствено нешто што можеби е позитивно, смета тој, се очекувањата за промена на општата економска слика и перцепцијата кај луѓето односно промена на сентиментот, кој се надева дека ќе се случи на крајот на годинава и почетокот на следната.
„Глобалниот пазар на капитал годинава солидно порасна“, вели Камчев кој појаснува дека францускиот индекс порасна за 14 отсто, додека германскиот за 16 отсто, а Nasdaq е во плус од околу 34 отсто.
„Концентрацијата на компаниите што остварија значителен раст отпаѓа на дваесетина компании од ИТ-секторот врзан со вештачката интелигенција. Тоа значи дека имаме најава за една технолошка револуција, која нуди можности што во иднина компаниите треба да ги истражуваат“, вели Камчев.
Притоа, тој посочува дека веројатноста за рецесија во САД значително се намалува. Сепак, предизвик останува зголемувањето на каматните стапки, а со тоа и поскапувањето на кредитите, што, пак, може да доведе и до одложување на некои инвестициски циклуси.
Очекувањата се дека неделава ФЕД и ЕЦБ ќе ги зголемат каматните стапки.
„Очекувам дека ФЕД уште еднаш ќе ја зголеми каматната стапка, а ЕЦБ уште двапати“, вели Камчев.
Тој појаснува дека по овие зголемувања би требало да има една фаза на паузирање. Сепак, Камчев смета дека е важно оти овие очекувани зголемувања на каматните стапки се вкалкулирани на пазарот на капитал.
