Минатата година македонските полнолетни граѓани просечно испиле по 1,9 литар купено вино, покажуваат податоците на Државниот завод за статистика. Но податоците покажуваат и дека Македонија и натаму повеќе извезува вино на точење отколку амбалажирано.
„Извозот на вино од Македонија минатата година вредносно порасна за околу 20 отсто, додека волуменски за околу 1,4 отсто, што укажува на генералната состојба на инфлација во Европа, односно зголемување на цените на производите“, вели Никола Љуботенски, директор за бизнис-развој во винарската визба „Имако вино“.
Тој посочува дека овој тренд го следи извозот и годинава.
„Има зголемување на продажбите во регионот, односно на пазарите во Србија, БиХ, Словенија и во Хрватска, а интересно е дека зголемувањето на овие пазари е резултат на намалените продажби на наливно вино, кое традиционално се извезува во Германија“, додава Љуботенски. Тој појаснува дека ова значи оти во изминатиот период македонското вино се нуди како производ со додадена вредност односно по зголемени цени, што овозможува и зголемен девизен прилив во државата.
Простор за дополнително стимулирање на извозот и натаму постои, а Љуботенски смета оти треба да се оди кон градење на препознатливоста на македонското вино на други пазари. Тој вели дека се потребни зголемени промотивни активности и од страна на бизнис-секторот, со цел да креира побарувачка за амбалажирано вино.
Во истата трка со Македонија се Молдавија и Грузија, кои брзаат да ја воспостават таа препознатливост на своето вино меѓу потрошувачите.
„Па, така, стимулациите на извозот и промоцијата би требало да бидат една долгорочна стратегија, на која ќе се работи во континуитет“, вели Љуботенски.
Тој посочува дека Министерството за земјоделство, шумарство и водостопанство ја донесе националната стратегија 2023-2033, која е во насока на стимулирање на извозот и промоцијата на македонските вина во следните десет години.
„Тие цели, иако можеби се оптимистички, сепак сметаме дека се остварливи“, додава Љуботенски.
Квалитетното вино почнува од лозовите насади, па преку преработката на грозје, производството на вино, како и маркетирањето и креирањето пазари што треба да го примат произведеното вино. „Производството мора да биде контролиран процес во секој од овие чекори“, вели Љуботенски.
Во Македонија најпромовирани црвени вина се вранецот и темјаниката, како пандан на црвениот вранец. Цените, според Љуботенски, би требало да се задржат на нивото од ланската година, но сепак не сè ќе зависи од бизнис-климата во која ќе се работи во следниот период.