Што ќе донесат законските измени за индустриските зони?

Со законските измени за индустриските зони прецизно се наведува дека домашните компании имаат право да станат дел од развојните зони и да имаат ист третман како и странските инвеститори, посочува директорот на ТИРЗ, Јован Деспотовски, во интервју за „Блумберг Адрија“.  

„Измените се носат со цел за она што веќе го започна оваа политичка гарнитура во државата, а тоа е изедначување на третманот на домашните со странските компании, фактички да го направи финалниот чекор. Ако пред пет години се донесе закон за финансиска поддршка на инвестиции каде што еднакво како и странските, и домашните компании на реализирана инвестиција имаат право да обезбедат одредена поддршка од државата. Следниот чекор е да обезбедиме целосна либерализација на сегментот на користењето на придобивките од технолошко-индустриските развојни зони, а тоа се секако земјишта со уредени сопственички права, пристап до современа патна и енергетска инфраструктура и, секако, она што е важно е пристапот до олеснети процедури за работење. Ќе дадам еден пример, одобренијата за градба на пример се издаваат само за неколку дена, додека во рамките на нормалното оперирање во самата држава за одобренијата се потребни повеќе месеци. Нашата одлука, односно идејата на институцијата и на Владата е доколку имаме успешен модел што функционира и што неоспорно носи сериозни резултати на планот на економијата, тој модел треба да го пресликаме и на преостанатата економија. Така што овие измени се во духот на тоа“, вели Деспотовски.  

Блумберг Адрија ТВ

Тој потенцира дека и претходно немало законски пречки домашни компании да инвестираат во зони, туку проблемот бил во практиката. Сега, за да нема никакви дилеми, според Деспотовски, законите се попрецизно формулирани.  

„Административната пречка пред сè постои во практикувањето на законот. Да кажеме дека во овие изминати 10 години фокусот бил ставен во работењето на странските инвеститори и оние практики што се веќе поставени, без разлика дали се потпираат на законски одредби или тоа е толкување на политичките елити и администрацијата, со овие измени настојуваме да ги надминеме. Многу прецизно ги дефинираме и можностите и јасно е ставено во регулативата дека сите оние компании што функционираат надвор од режимот на ТИРЗ имаат можност да станат дел од зоните. Доколку и досега имало некоја  дилема околу ова прашање, со измените веќе прецизно пишува дека може“, вели Деспотовски.  

Блумберг Адрија ТВ

Деспотовски вели дека веќе има договори со две домашни компании што ќе инвестираат во технолошко-индустриската развојна зона во Скопје.   

„Договорите се подготвени пред неколку месеци. Очекувам да ги објавиме и пред да се донесат законските измени бидејќи ги имаме сите аргументи и тие договори се дозволени и треба да се случат. Домашни компании што придонесуваат реално во буџетот на државата треба да добијат можност да се развиваат понатаму и да креираат нови работни места.  Она што го започнавме како тренд е дивезрификацијата на економијата во рамките на ТИРЗ. Ако досега околу 95 отсто од економската активност се базираше на индустрии поврзани со автомобилската, овие две инвестиции не се поврзани со автомобилската индустрија, со што ќе го продолжиме овој процес на диверзификација. За двете компании е обезбеден простор во технолошко-индустриската развојна зона во Скопје“, вели тој.  

Директорот на ТИРЗ очекува во 2023 година инвестициите да надминат половина милијарда евра. 

„Тоа секако ќе биде највисоко ниво досега. Ова се должи меѓу другото и на неодамнешниот договор за германската инвестиција за производство на батерии, со вредност од 65 милиони евра. Очекуваме околу 750 нови работни места. Она што ме радува е што компаниите што инвестираат плаќаат повисоки плати од националниот просек“, додава Деспотовски.