Со владина одлука компаниите ќе можат да се селат во зоните

Со одлука на Владата, компаниите ќе може да се селат во технолошките зони и да користат државна помош. Тоа е предвидено во измените и дополнувањата на Законот за технолошки индустриски развојни зони (ТИРЗ).

„Релокација на постојно претпријатие во технолошко индустриска развојна зона (релокација во зона), по исклучок се дозволува со претходна одлука на Владата на Република Северна Македонија, доколку истата се врши во технолошко индустриска развојна зона која е оддалечена најмногу 50 километри од подрачјето каде во моментот работи постојното претпријатие, а истата нема да има за последица намалување на работните места две години од релокација, а претпријатието кое има намера да се релоцира во зона, две години пред доставување на намерата за релокација во зона не ги намалило работните места во истата или слична дејност во едно од постојните претпријатија на корисникот на друго подрачје на територијата на Република Северна Македонија, за што доставува изјава заверена на нотар“, се наведува во членот 4б.

Освен гаранција дека две години немало и нема да има отпуштања, компаниите ќе треба да достават и план со кој ќе дефинираат кога ќе почнат со градба, а кога со производство. Треба да се изјаснат за вкупната вредност на инвестицијата, колку вработени се предвидени и со какви квалификации, динамика на вработување за период од десет години, како и план на приходи и добивка за период од десет години и за идно проширување.

Ако владата на писмото со намери на заинтересираната компанија одговори позитивно, „претпријатието што ја врши релокацијата во технолошко индустриска развојна зона ќе може да користи државна помош освен даночни ослободувања и олеснувања утврдени во членот 5 од овој закон“, се наведува во предлогот.

Погодности во зоните

Во изјава за „Блумберг Адрија“ директорот на Дирекцијата за ТИРЗ, Гоце Димовски, вели дека релокација ќе може да вршат само компании кои имаат сериозни планови за проширување на своите инвестиции.

„Целта на измените на законот е Македонија ја добие квалитетни инвеститори во ова време на тешка криза во западните земји. Овие измени требаше да се случат порано, пред седум или осум години поради усогласувања кои ќе донесат повеќе инвестиции и повеќе работни места“, изјави Димоски. 

Во делот на државната помош што со релокацијата во зоните ќе ја добијат овие компании, во предлогот се наведува дека може да се додели за почетно инвестирање во материјални и нематеријални средства, без даночни ослободувања и олеснувања.

Инвеститорите во зоните се ослободени од плаќање надоместок за уредување на градежното земјиште, а Владата може да учествува во трошоците за изградба во висина од 100.000 до 500.000 евра во зависност од висината на инвестицијата и бројот на отворени работни места.

Закупот во зоните може да трае до 99 години, а закупувач може да биде домашно и странско физичко и правно лице што е регистрирано за вршење дејност во согласност со Законот за трговските друштва и кое има договор со зоната.

Обврска на закупувачот е да почне да гради во рок од девет месеци и во рок од 30 месеци од склучувањето на договорот да почне да врши дејност. Ако еден од овие два услова не биде испочитуван, договорот се раскинува.

Се зголемуваат платите во Дирекцијата

Членот 11 од предлогот на законот утврдува дека вработените во Дирекцијата за ТИРЗ ќе имаат поголеми плати. 

Вработените лица во Дирекцијата за технолошки индустриски развојни зони имаат статус на административни службеници и за нив се применуваат одредбите од Законот за вработени во јавен сектор и Законот за административни службеници. Административните службеници во Дирекцијата, поради специфичната природа на надлежностите на Дирекцијата и комплексноста на работните задачи, имаат право на зголемување на основната плата и додатокот на плата за ниво.

Зголемувањето на платите се уредува со колективен договор или подзаконски акт што го носи управниот одбор на Дирекцијата, „а средствата покрај тоа што се обезбедуваат од буџетот на Република Северна Македонија, може да се обезбедат и од сметката за самофинансирачки активности на Дирекцијата“.

Проблемите на постојните инвеститори

Советот на странски инвеститори минатата недела ја објави анкетата за услови за работа за минатата година. Истражувањето беше спроведено на крајот на минатата и почетокот на оваа година меѓу педесетина странски компании, од кои близу половина се сместени во зоните.

Анкетата покажа дека овие компании имаат инфраструктурни проблеми. Тие бараат подобри пристапни патишта, подобар јавен превоз, подобро снабдување со струја и гас.

 

 

Текстот е ажуриран со изјавата на дирекорот на Дирекцијата за ТИРЗ, Гоце Димовски.