Цени „под мраз“: Антиинфлаторна или популистичка мерка?

Повторното ограничување на цените на дел од прехранбените производи без дополнителни мерки нема да има ефект. Привремените мерки во одреден момент ќе мора да се повлечат, а тогаш цените повторно ќе рипнат, вели во интервју за „Блумберг Адрија“ Ангел Димитров од Организацијата на работодавци.  

„Овие мерки повеќе се насочени кон заштита на ранливите категории на граѓани, а не кон намалување на инфлацијата, бидејќи во инфлацијата учествуваат многу повеќе производи од овие што се вклучени во замрзнувањето. И претходно имаше вакви мерки за замрзнување цени, замрзнување маржи. Сите тие се мерки што не се компатибилни со една пазарна економија и сето ова е 'гасење пожари'. Суштината е дека ние имаме пад на земјоделското производство, сè поголема увозна зависност на храна и покрај високите субвенции, и тоа е една од главните причини зошто ние имаме повисока инфлација во прехранбената индустрија за разлика од другите стоки на пазарот“, вели Димитров. 

Гостување на Ангел Димитров Bloomberg Adria

Инаку, Владата најави дека од утре педесетина производи во маркетите ќе треба да имаат ознака „гарантирана цена“, а ограничувањата ќе траат до крајот на ноември. 

Станува збор за 25 категории и над 50 производи од пекарската, месната, млечната и кондиторската индустрија, кои во маркетите ќе се продаваат со ознака, а ќе чинат колку што се продавале на 1 август и дополнително на тоа намалени за 10 отсто.  

Но, според Димитров, проблемот лежи на друго место. Тој потенцира дека Владата мора да се насочи кон преземање мерки за раст на продуктивноста и креирање услови за зголемување на домашното земјоделско производство.  

Bloomberg Adria

Тој ги критикува и фискалните политики на Владата, како растот на плати во јавниот сектор и минималната плата, кои, како што вели, се косат со политиките на централната банка, која се обидува да ја скроти инфлацијата преку раст на каматните стапки.   

„Честопати се случува од една страна централната банка да воведува мерки за намалување на парите во оптек и побарувачката, со цел да ја намали инфлацијата, а од друга страна фискалната политика креира такви мерки со кои ја стимулира таа инфлација. Вие знаете дека ние имавме присилно нагло зголемување на минималните плати, кои достигнаа 62 отсто во однос на просечната плата, со што сме рекордери во Европа. Од друга страна, со некои лоши политики, како зголемувањето на платите на функционерите, создадовме побарување кај многу луѓе за раст на платите, иако сме свесни дека немаме таков раст на нашата продуктивност. За жал, сè уште сме на дното во Европа по продуктивноста по еден работен час и тоа мора да ни е освестување. Ние не можеме само да бараме повеќе, туку мора и да произведуваме повеќе. Ако не го направиме тоа, ваквите мерки едни со други ќе се компензираат,  Народната банка ќе ги зголемува каматите, тоа ќе влијае негативно на економскиот раст, на пад на економијата, индустриското производство и извозот, а од друга страна ќе воведуваме мерки со кои ќе ја стимулираме побарувачката. Значи, мора многу внимателно да ги усогласуваме фискалната и монетарната политика“, потенцира Димитров.