.webp){kind=icon}
Владините мерки за ограничување на цените ќе нанесат удар пред сè врз производителите. Ниските ограничени цени носат ризик и од недостиг од производи на пазарот, вели во интервју за „Блумберг Адрија“ Румен Смилевски од компанијата „Малина Велес“.
Смилевски смета дека не е добро кога државата се меша на пазарот, но, сепак, не очекува ценовен шок кога ќе престанат да важат мерките за ограничени цени.
„Не верувам дека по ова ќе има нов раст на цените, бидејќи овие производи што се опфатени се пред сè производи чии цени не биле многу високи. Владата можеби ќе ја промени малку својата одлука во некои артикли каде што погрешила, како на пример кај јајцата, каде што мислам дека цената што е предвидена е погрешна. Затоа и се чувствува недостиг од јајца. Но, мислам дека тоа ќе се промени, бидејќи најлош ефект е да немаме стока во дуќаните“, вели Смилевски.
Гостување на Румен Смилевски
Bloomberg Adria
Рекордната инфлација, пак, ги напумпа и приходите на некои трговци поради високите цени на производите. Но, од друга страна, во економската криза растеa и трошоците. Кој победи во таа трка?
„Победник сè уште не можеме да кажеме, ќе видиме што ќе дадат завршните резултати на крајот на годината, но верувам дека ситуацијата е сериозна. Имаме цени што енормно се покачија поради растот на енергентите, но кога се стабилизираа цените на струјата, доста фирми ги намалија цените на своите производи. Но, еве, што се случува. На пример ние соработуваме со голема компанија со која минатиот месец договоривме поголемо количество брашно, кое го испорачуваме околу еден месец. Но по цената што ја договоривме пред еден месец, вчерашните камиони ни беа со негативна калкулација, бидејќи ние работиме со минимални маржи на големо, а превозот се покачи и ние бевме принудени да го прифатиме тоа поради растот на нафтата“, вели Смилевски.
Bloomberg Adria
Коментирајќи го растот на каматните стапки, Смилевски очекува намалената куповна моќ на граѓаните допрва да се одрази и со намалување на потрошувачката.
„Растот на каматните стапки секако дека ќе има влијание и врз крајниот, бидејќи голем дел компании работат со кредити. Каматите се зголемија сериозно, но гледам дека во последно време и банките имаат вишок средства и почнуваат да ги намалуваат каматите, што е добро. Но понудата и побарувачката си го прави своето“, вели директорот на „Малина Велес“.
