Стапката на раст кај станбените кредити е позиционирана на околу 10,8 отсто, што е забавување со оглед на тоа што претходно растот изнесуваш околу 16 отсто. Сепак, колку тоа влијае на цените на недвижностите?
„Многу е тешко да се предвидат движењата на пазарот на недвижности затоа што сето тоа е поврзано со обемот на понудата и побарувачката, како и со многу други аспекти на живеењето, носењето детални урбанистички планови и нивното усвојување, овозможувањето градба, обемот на понудата што ќе се јави во одреден момент на пазарот и се разбира атрактивноста на локациите“, вели во интервју за „Блумберг Адрија“ Горан Марковски, декан на Градежниот факултет при УКИМ во Скопје.
Тој посочува дека во Македонија локацијата односно нејзината атрактивност е она што влијае најмногу на цената на становите.
„Со отворањето на неколку нови локации како градилишта, особено во централното градско подрачје на Скопје, имам впечаток дека цените на становите нема да паѓаат така лесно како што би претпоставувале туку, напротив, ако влезат во просекот, таа цена ќе се одржи на истото ниво“, вели Марковски.
Нереални цени на недвижностите во Скопје
Сведоци сме, според Марковски, дека само на неколку километри оддалеченост од центарот на Скопје, цените на становите се можеби половина од тие во централното градско подрачје. А на прашањето дали цените од 2.500 евра за квадратен метар се реални, неговиот одговор е негативен.
„Според мене, тие не се реални цени. Тие не произлегуваат од цената на чинење, бидејќи локацијата влијае на цената во одреден процент, меѓутоа не дотолку за тие разлики да бидат толкави. Сè додека има побарувачка, цените на становите ќе го држат нивото што го имаат сега“, вели Марковски.
Марковски смета оти се искористи моментот на подигнувањето на цените на материјалите за да се направи едно вештачко подигнување на цената на квадрат станбен простор и сега тешко се враќа тоа.
„Дополнително што моментално сме соочени и со голем недостиг од работна рака, како од аспект на оние што се занимаваат со изведба на конструкција така и со занаетскиот дел од работите. Цените поради тој недостиг се исто така зголемени и тоа влијае во висината на квадратниот метар“, заклучува Марковски.
Цените на недвижностите нема да се намалуваат, но нема ниту да растат
„Што се однесува на делот од пазарот на недвижности во Македонија, пред сè во Скопје, повеќе фактори влијаат на тоа што во минатиот период се случи да има одредени нагли покачувања на цените на недвижностите“, вели во интервју за „Блумберг Адрија“ Ивица Јакимовски, сопственик на „Голден арт“.
„Сега е период кога имаме стабилизација. Невозможно е да има дополнителни поскапувања, но не може да има ниту драстичен пад на цените на становите“, вели Јакимовски.
Тој додава дека можеби има помала побарувачка, но и понудата е помала.
„Од една страна, може да има одредено помало побарување, но има и многу намалена понуда што се однесува на делот на недвижности, затоа што сме ограничени со мал број локации што постојат за да можат да се градат недвижности во однос на станбен и деловен простор“, вели Јакимовски.
Дополнително, тој смета дека 2.500-3.000 евра за квадратен метар во Скопје има само на одредени локации. кои се во мал број и не може да бидат репер за пазарот на недвижности.
„Цените што се движат на најатрактивните делови во градот се со помала вредност, и тоа се околу од 1.900-2.300 евра“, заклучува Јакимовски.