Вртоглав раст на цените на становите во Скопје од 22,3 проценти во вториот квартал од 2025 година

Народната банка бележи значителен годишен раст на цените на становите во Скопје од 22,3 проценти во вториот квартал од 2025 година. Цените на становите во главниот град продолжуваат со забревтан раст во период во кој се бележи спласнување на изградбата на нови станови. Имено, „Блумберг Адрија“ веќе пишуваше дека во периодот јануари-април годинава во Скопје биле издадени одобренија за градење на вкупно 1.232 стана, што е за 18 проценти помалку од истиот период минатата година кога биле зидадени одобренија за вкупно 1.559 станови.

Како Народната банка го пресметува движењето на цените на становите

Индексот на цените на становите е изготвен од страна на НБРСМ за територијата на Скопје. Индексот е изготвен врз основа на податоци кои се однесуваат на огласите за продажба објавени од агенциите коишто се занимаваат со промет со недвижности. Пресметката на индексот е направена преку хедоничкиот метод, а фреквенцијата на индексот е со квартална динамика.

„Хедоничките ценовни индекси се базираат врз хедоничките ценовни модели, според кои цената на еден производ е функција којашто произлегува од неговите карактеристики. Цената на станот е функција којашто произлегува од големината на станот, населбата во која се наоѓа, катот, од тоа дали станот има централно греење и од тоа дали станот е нов. Основната предност на хедоничкиот метод при конструкцијата на ценовните индекси во однос на конвенционалните методи (кои се темелат врз следењето на цената на еден ист производ низ време) е експлицитното препознавање на влијанието на квалитетот врз цената“, се наведува во објаснувањето од Народната банка.

Според НБРСМ, хедоничките индекси овозможуваат пресметување на чистата промена во цената, односно промена во цената којашто не е резултат на подобрувањето на производот.

„Токму заради ова, овие ценовни индекси најчесто се пресметуваат за производи коишто рапидно се менуваат - високотехнолошките производи, компјутерите, автомобилите, но и становите“, укажуваат од НБРСМ.

Над милијарда евра се свртеле лани во недвижности, продажните цени енигма

„Блумберг Адрија“ веќе пишуваше дека во секторот недвижности лани за првпат се свртеле над милијарда евра. Податоците од Агенцијата за катастар за 2024 година покажуваат дека биле извршени вкупно 22.548 трансакции, а нивната вредност изнесува 1.006.685.832 евра.

Близу половина од вредноста на купопродажбите или над 490 милиони евра отпаѓа на становите, а во текот на 2024 година биле купени 8.018 стана. Во однос на 2023 година биле продадени 500 стана повеќе, но нивната вредност била поголема за 60 милиони евра.

Во податоците што „Блумберг Адрија“ недоамна ги побара од катастарот нема детали за тоа во кои општини се продавале најскапите станови, ниту пак е наведена просечната цена на квадратен метар во земјава. Ваквите податоци порано се објавуваа во рамките регистарот за цени и закупи, кој не е ажуриран од третиот квартал во 2020 година. Сегашното раководство на катастарот не ги знае причините зошто процесот прекинал, но најави дека ќе го врати во живот.

Државата во битка за реални цени

Во македонската јавност подолг период преовладува мислењето дека цените на станбениот квадрат во главниот град кои на некои локации надминуваат над 2.500 евра се нереални односно претерано високи. Токму затоа државата, преку јавното претпријатие за станбен и деловен простор (АДИССДП) неодамна најави засилени инвестиции во изградба на комерцијални станбени згради, со цел да се намали цената на станбениот квадрат.

„Веќе извесен период пазарот на недвижности се соочува со експлозија на цените на станбениот квадрат. Секако дека побарувачката го диктира порастот, но време е да му се стави крај на самоволието на приватните градежници“, велат од АДИССДП. Со изградбата на поевтини станови, оттаму се надеваат дека „во вистинска смисла може да влијаат врз пазарот на недвижности нудејќи реални цени на становите“.

„Притоа, треба да имаме предвид дека нам ни е потребна изградба на поголем број комерцијални станбени згради, за што ќе ни треба и повеќе време“, додаваат од јавното претпријатие.

Во моментов нема коментари за веста. Биди прв да коментира...

Остави коментар