Со измените на уредбата за начинот на пресметка на данокот на моторни возила ќе се зголемат даноците за луксузните и многу старите возила.
Новата методологија се заснова на мерење на емисијата на издувни гасови во реална околина, а според увозниците на возила, тоа ќе ги направи луксузните автомобили понедостапни за нашиот пазар.
„Нашите пресметки покажуваат дека ограничувањата до 150 грама на CO2 остануваат исти, со сè што оди нагоре систематски се покачува цената. Односно, на веќе големите увозни давачки при увозот на возила имаме и нови ставки. Луксузните возила ќе бидат поскапи, но и старите возила што испуштаат повеќе CO2, како возилата од 2006, 2007, 2008 година, ќе бидат недостапни за нашиот пазар. Табелите се направени така што колку е поголемо испуштањето на CO2, толку е поголема и цената. Односно во проценти почнуваат од пет до десет проценти, пет проценти е најмалата ставка, тоа е ставка од 140-150 грама, а за големите загадувачи, односно возилата што испуштаат над 220 грама CO2 давачката се зголемува за околу 80 проценти. Тоа значи дека возилата што ги увезуваме ќе претрпат некои измени од седум до десет проценти на давачките при увозот на возила, а тоа не значи дека за толку ќе поскапат возилата, туку ќе поскапат за два-три отсто на крајната продажна цена. Но луксузните возила веќе стануваат луксуз. Односно сите возила со поголеми агрегати ќе стануваат понедостапни за нашиот пазар“, вели во интервју за „Блумберг Адрија“ Александар Димовски, увозник на половни возила.
Тој потенцира дека Македонија веќе има најголеми давачки при увоз на возила за разлика од другите земји во регионот. Во наредниот период, според него, увозниците ќе се осврнуваат на увоз на поеколошки возила.
„Откако цените на новите возила драстично се зголемија поради падот на производството, сега ќе претрпат уште едно мало поскапување, кое мислам нема да биде толку значително, бидејќи цените веќе се многу зголемени за овие две-три години. Кај користените возила ќе се осврнеме на увоз на возила со помала емисија на CO2, односно ќе се трудиме да увезуваме поеколошки возила, каде што нема да бидеме засегнати со покачување, бидејќи цените при увоз на возила се драстично поголеми од сите увозни давачки во земјите од целиот регион“, вели Димовски.
А за исполнување на целта – декарбонизација на транспортот, Димовски потенцира дека се неопходни и други мерки, како подобрување на инфраструктурата и субвенционирање на купувањето хибридни и електрични возила.
„Без директна субвенција од државата, тешко ќе дојдеме до еколошки возила. Субвенциите би биле при увозот или при купувањето такви возила, односно трендот на хибриди и електрични возила што го следи цела Европа. Без директни субвенции тешко ќе ги следиме овие трендови. Со овие уредби ќе има одредено влијание, но државата треба да се осврне и кон куповната моќ на граѓаните“, вели Димовски.